Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 745 Hüküm no: 1234 Orijinal metin no: [101a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Enserci Avanis’in sahtiyan bedelinden alacağının borçlunun vârislerince ödenmesi Ma‘rûz Medîne-i Üsküdar’da Atpazarı’nda Enserci Avanis v. Asvador nâm zimmî medîne-i mezbûrede mahfil-i Bâb’da meclis-i şer‘-i hatîrde müteveffâ Balmumcu el-Hâc Mustafa’nın hasren vârisesi ve terekesine bi’l-verâse vâzı‘atü’l-yed olan sulbiye kebîre kızı Şemsiye Hatun’un zevci ve tarafından ber-vech-i atî vekîl-i şer‘îsi es-Seyyid Ahmed Ağa b. Ali mahzarında müteveffâ-yı mezbûr zimmetinde aded ve fiyâtı beynimizde ma‘lûm sahtiyân semeninden yirmi yedi guruş otuz para hakkım olup kable’l-edâ vefât edip terekesine vâzı‘atü’l-yed olan mezbûre Şemsiye Hatun’un zevci mezbûr es-Seyyid Ahmed Ağa’nın vekâletiyle târih-i i‘lâmdan yirmi altı ay mukaddem mezbûr es-Seyyid Ahmed Ağa’dan talebe yeldiğimde ol dahi bi’l-külliye inkâr ve ben ber-vech-i muharrer müdde‘âmı ba‘de’l-isbât ve’l-half meblağ-ı merkūmun yüz on parasını bi’r-rızâ tenzîl ve bâkī yirmi beş guruşu müvekkile-i mezbûre zimmetinde kalmışdı deyü takrîrine mutâbık ve târih-i merkūm ile müverrah bir kıt‘a i‘lâm-ı şer‘î ibrâzıyla da‘vâ ol dahi cevâbında ber-vech-i muharrer mazmûn-ı i‘lâmı ikrâr lâkin müdde‘î-i merkūmun müdde‘âsı olan meblağ-ı bâkī-i merkūm yirmi beş guruşu tamamen kendiye edâ ve teslîm etmişdim deyü ba‘de’d-def‘ ve’l-inkâr dâfi‘-i mezbûr es-Seyyid Ahmed Ağa ber-minvâl-i muharrer eylediği def‘ini beyândan izhâr-ı acz edip talebiyle merkūm Avanis zimmî gıbbe’t-tahlîfi’ş-şer‘î mûcibiyle meblağ-ı bâkī-i merkūm yirmi beş guruşu müdde‘î-i merkūm Avanis zimmîye [edâya] müvekkilesine izâfetle mezbûr es-Seyyid Ahmed Ağa’ya şer‘an tenbîh olunduğu bi’l-iltimâs huzûr-ı âlîlerine i‘lâm olundu. Fî 29 min-Recebi’l-ferd sene 1206.