Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 746 Hüküm no: 1236 Orijinal metin no: [101b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Maryem bt. Haçador’un vârislerinin sulh oldukları Ma‘rûz Medîne-i Üsküdar’da Yenimahalle’de mütemekkine iken bundan akdem hâlike olan Maryem bt. Haçador nâm Nasrâniyenin verâseti zevc-i metrûkü Bogos v. Marzık nâm zimmî ile li-ebeveyn ammisi oğlunun oğlu Hanparsom v. Avanis nâm zimmîye münhasıra ve terekesinin nısfı zevc-i merkūm Bogos’a ve nısf-ı âharı merkūm Hanparsom’a isâbeti tahakkukundan sonra merkūm Hanparsom medîne-i mezbûrede mahfil-i Bâb’da meclis-i şer‘-i hatîrde tereke-i hâlike-i mersûma vâzı‘ü’l-yed olan zevc-i merkūm Bogos zimmî muvâcehesinde merkūm Bogos zimmî mûrisimiz hâlike-i merkūmenin mahalle-i mezbûrede vâki‘ bir bâb mülk menzili ve derûnunda olan bi’l-cümle eşyâsını ve medîne-i mezbûrede Gülfamhatun Câmi‘-i şerîfi derûnunda vâki‘ dakīk değirmeninde olan beyne’l-esnâf gedik ta‘bîr olunur bârgirlerden nısf hisse-i şâyi‘amı fuzûlî kabz ve zabt ve tasarrufdan beni men‘ etmekle ber-tashîh-i merkūm emlâk-ı mezkûreden bana isâbet eden nısf hisse-i şâyi‘amı bin iki yüz beş senesi Zilhicce’sinin on sekizinci günü târihiyle müverrah işbu yedinde olan bir kıt‘a i‘lâm-ı şer‘î nâtık olduğu üzere ben hisse-i mezkûremi zevc-i merkūmdan taleb ve da‘vâ eylediğimde beynimizde münâza‘ât-ı kesîre vukū‘uyla beynimizde muslihûn tavassut edip ben ber-vech-i muharrer tasaddî eylediğim da‘vâmdan yüz elli yedi guruş bedel-i makbûz mukābelesinde merkūm Bogos zimmî ile sulh olup menzil-i mezkûra ve derûnunda olan eşyâsına ve değirmen hissesine ve hâlike-i merkūmenin kalîl ve kesîr menkūl ve akār cemî‘-i terekesine ve husûs-ı mîrâsa müte‘allika âmme-i de‘âvîden zevc-i merkūmun zimmetini ibrâ ve ıskāt eylediğimde ol dahi ber-vech-i muharrer ibrâmı kabûl etmişdi lâkin merkūm Bogos zimmî ba‘de’s-sulh bana medfû‘u olan bedel-i sulh-ı merkūm yüz elli yedi guruşdan mâ‘adâ zikr olunan değirmenin hâsılâtından sümün ta‘bîr olunur on iki sümünden bir sümün hisse-i ma‘lûmesini dahi bana şer‘an vermek üzere va‘ad ve ta‘ahhüd eylediğine binâen bir sümün hisse-i ma‘lûmemi taleb ederim deyü takrîr-i meşrûhu üzere merkūm Bogos zimmîden ba‘de’l-ibrâ eylediği da‘vâsına iltifât olunmadığı bi’l-iltimâs huzûr-ı âlîlerine i‘lâm olundu. Fî 14 min-Ş sene 1206.