Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 747 Hüküm no: 1237 Orijinal metin no: [101b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa, Seyyid Ali Efendi ve Turnacı İbrahim Ağa’nın alacak-verecek hususunda birbirlerinin zimmetlerini ibra ettikleri Ma‘rûz Medîne-i Üsküdar’a muzâfe Karamürsel nâhiyesine tâbi‘ Aydınlı karyesi ahâlisinden Mustafa b. Yusuf medîne-i mezbûrede mahfil-i Bâb’da meclis-i şer‘-i hatîrde es-Seyyid Ali Efendi b. Mustafa mahzarında bundan akdem mezbûr es-Seyyid Ali Efendi zimmetinde cihet-i deyn-i şer‘îden yüz altmış dört guruş hakkımın elli guruşunu ahz ve yüz on dört guruşu zimmetinde bâkī kalıp mezbûr es-Seyyid Ali Efendi’nin dahi gāib ani’l-meclis Turnacı İbrahim Ağa zimmetinde yüz on dört guruş alacak hakkı olmağla mezbûr es-Seyyid Ali Efendi deyn-i meblağ-ı merkūm yüz on dört guruş ile beni gāib-i mezbûr üzerine havâle-i mukayyede ile havâle ve hîn-i havâlede herbirimiz havâleyi kabûl etmişdik lâkin ben meblağ-ı bâkī-i merkūm yüz on dört guruşu gāib-i mezbûrdan taleb eylediğimde edâdan imtinâ‘ eylediğine binâen havâle-i mezkûreden rücû‘ etmemle yine mezbûr es-Seyyid Ali Efendi’den taleb ederim deyü bundan akdem müdde‘î-i mezbûrun mezbûr es-Seyyid Ali Efendi’den …? tahakkuk etmeksizin meblağ-ı merkūmu mutâlebesi mesmû‘a olmayıp müdde‘î-i mezbûr bî-vech-i şer‘î mu‘ârazadan men‘ olundukdan sonra müdde‘î-i mezbûr meblağ-ı bâkī-i merkūm yüz on dört guruşun on dört guruşunu tekrar gāib-i mezbûrdan ahz ve yüz guruşu gāib-i mezbûr zimmetinde kalmışken dâyin-i merkūm Mustafa ile mezbûr es-Seyyid Ali Efendi rızâlarıyla havâle-i mezkûreyi feshetdiklerinden sonra mezbûr es-Seyyid Ali Efendi meblağ-ı merkūm yüz guruşu işbu meclis-i şer‘de mezbûr Mustafa’ya bi’r-rızâ def‘ ü teslîm eylediğinden ol dahi yedinden tamamen ahz ü kabz edip gerek mezbûr es-Seyyid Ali Efendi’nin ve gerek gāib-i mezbûr İbrahim Ağa zimmetlerini ibrâ ve ıskāt ve herbiri âharın ber-vech-i muharrer ibrâsını kabûl edip bu vechile kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 16 min-Ş sene 1206.