Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 748 Hüküm no: 1238 Orijinal metin no: [101b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine bt. Osman’ın bir miktar para ve eşya alacağı olduğu iddiasını ispat edemediği Ma‘rûz Mahmiye-i İslâmbol’da Acımaslak kurbünde sâkine mu‘arrefetü’z-zât Emine bt. Osman nâm hatun medîne-i Üsküdar’da mahfil-i Bâb’da meclis-i şer‘-i hatîrde mukaddemâ dâmâdı el-Hâc Ahmed Ağa b. İbrahim nâm kimesne mahzarında târih-i i‘lâmdan altı ay mukaddem zevce-i mutallakası kızım Hadice Hatun yediyle yedimden istidâne ve kabz ve umûruna sarfla istihlâk eylediği yüz guruş ve târih-i merkūmda kızım mezbûre Hadice’yi tatlîk esnâsında emlâkimden mecmû‘-ı kıymetleri yetmiş beş guruşa bâliğ bir bürüncek gömlek ve üç uçkur ve bir penbe zar gömlek ve iki don ve üç çevre ve bir sâ‘at kesesi ve bir akçe kesem mezbûr el-Hâc Ahmed yedinde kalmağla meblağ-ı merkūm yüz guruş ile eşyâ-i mezkûrenin mevcûd ise a‘yânını müstehleke [ise] ba‘de’s-sübût kıymet-i mezkûresini taleb ederim deyü ba‘de’d-da‘vâ ve’l-istintâk ve’l-inkâr müdde‘iye-i mezbûre ber-vech-i muharrer müdde‘âsını isbâta kādir olamayıp bi’t-taleb mezbûr el-Hâc Ahmed gıbbe’t-tahlîfi’ş-şer‘î mûcibiyle müdde‘iye-i mezbûre da‘vâ-yı mezkûresiyle mezbûr el-Hâc Ahmed’e bilâ-beyyine mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 3 min-Ş sene 1206.