Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 748 Hüküm no: 1239 Orijinal metin no: [101b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Beşe b. Mustafa’nın emanet bıraktığı eşyalarıyla ilgili davada sulh olduğu Ma‘rûz Mahrûse-i Galata’da misâfiren sâkin kalyoncu neferâtından Ali Beşe b. Mustafa nâm kimesne ve yine Üsküdar’da mahfil-i Bâb’da meclis-i şer‘-i hatîrde mu‘arrefetü’z-zât Şerife Fatıma bt. Ali nâm hatun mahzarında târih-i i‘lâmdan bir sene mukaddem emlâkimden mecmû‘-ı kıymetleri yirmi bir buçuk guruşa bâliğ bir tahta sandık ve iki sahan ve bir işleme akçe kesesi ve bir basma mak‘ad ve bir minder ve bir fincan tepsisi ve dört fağfûrî fincan ve bir yasdığımı mezbûre Şerife Fatıma yedine li-ecli’l-hıfz emâneten vaz‘ ve teslîm etmemle taleb ederim deyü eylediği da‘vâsından bâ-tavassut-ı muslihîn mezbûre Şerife Fatıma Hatun ile an-inkâr on guruş bedel-i makbûza sulh olup ziyâde müdde‘âsı olan on bir buçuk ve bi’l-cümle husûs-ı mezkûra müte‘allika âmme-i de‘âvîden mezbûre Şerife Fatıma’nın zimmetini ibrâ ve ıskāt eyledikde ol dahi ibrâsını kabûl ve medfû‘u olan bedel-i sulh-ı merkūm on guruşa müte‘allika âmme-i de‘âvîden müdde‘î-i mezbûr Ali Beşe’nin zimmetini ibrâ ve ıskāt ve herbiri âharın ber-vech-i muharrer ibrâsını kabûl edip bu vechile kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 3 min-Ş sene 1206.