Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 749 Hüküm no: 1240 Orijinal metin no: [102a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Uygunsuz hareketlerinden dolayı Ayşe bt. Mehmed’in mahalleden çıkarılması Ma‘rûz Bi’l-iltimâs kıbel-i şer‘-i şerîfden meb‘ûs es-Seyyid Abdurrahman Efendi dâ‘îleri ümenâ-i şer‘le medîne-i Üsküdar’da Vâlide-i Atik mahallesinde vâki‘ sâbıkā menzil halîfesi sâhib-i arzuhâl Mehmed Efendi b. Mehmed’in müsteciren sâkin olduğu menzile varıp mazbûtü’l-esâmî Müslimîn huzûrlarında akd-i meclis-i şer‘-i şerîf etdikde mahalle-i mezbûrenin başimâmı vekîli Molla Süleyman b. Hüseyin ve cemâ‘atinden eş-Şeyh Ali b. Ali ve Mustafa Efendi b. Hüseyin ve Ali Ağa b. Zeynelabidin ve Derviş Mehmed b. el-Hâc Ahmed ve eş-Şeyh Ahmed Efendi b. Abdülkerîm ve es-Seyyid Hüseyin Ağa b. Receb ve Mehmed b. Ali nâm kimesneler meclis-i ma‘kūd-ı mezkûrda mûmâ-ileyh Mehmed Efendi’nin kayınvâlidesi olup derûn-ı arzuhâlde mezkûre mu‘arrefetü’z-zât Bursalı Şerife Âişe bt. Mehmed nâm hatun mahzarında mezbûre Şerife Âişe kendi hâlinde ırzıyla mukayyed olmayıp dil-âzer ve hadîdetü’l-lisân olup dâmâdı mûmâ-ileyh Mehmed Efendi’nin menzilinde sâkine olup câriyeleriyle gavga ve mûmâ-ileyh Mehmed Efendi men‘ irâdesinde olduğundan itâle-i lisân edip şematâta bâ‘is ve ol-vechile bizleri bî-huzûr eylediğinden mâ‘adâ bizlere dahi şütûm ile şetm ve ırzımızı hetk etmekle mezbûre Şerife Âişe’ye bi’d-defa‘ât nush ü pend eylediğimizde mütenassıha olmayıp ef‘âl-ı sâbıkā[da] ısrâr ve bu vechile emn ü rahatımız meslûb olmuşdur deyü mezbûre Şerife’nin sû’-i hâlini muvâcehesinde ihbâr ve mahalle-i mezbûreden ihrâc olunmak bâbında fermân-ı âlîleri sudûrunu herbiri istid‘â ve istirhâm eylediklerini mezbûr dâ‘îleri mahâllinde ba‘de’t-tahrîr ve’l-inhâ mübâşiri çavuş kulları iltimâsıyla huzûr-ı âlîlerine i‘lâm olundu. Fî 25 min-N sene 1206.