Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 750 Hüküm no: 1241 Orijinal metin no: [102a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Esnafın şikâyeti üzerine Dülger Makar ile Balıkçı Palo’nun mahalle aralarında süt satmamaya söz verdikleri Ma‘rûz Medîne-i Üsküdar’da südcü ve yoğurtcu esnâfının kethudâları Osman b. Ahmed ve ustalarından Mustafa b. Mustafa ve diğer Mustafa b. el-Hâc Mehmed ve Ömer b. Osman ve Mustafa b. Ahmed ve diğer Mustafa b. Osman nâm kimesneler ile İstoyan v. Zelyo nâm zimmî medîne-i mezbûrede mahfil-i Bâb’da meclis-i şer‘-i hatîrde dülger tâifesinden Makar v. Asvador ve balıkçı tâifesinden Palo v. Nikola nâm zimmîler muvâcehelerinde bizler eyyâm-ı şitâda kârhânelerimizin menâfi‘i kalîl olduğundan eyyâm-ı sayfa intizâr ve medîne-i mezbûre hâricinde vâki‘ mandıra ve sâir mahallerden iştirâ ve âdemlerimiz ile medîne-i mezbûreye nakleylediğimiz südün bir mikdârını herbirimiz kârhânemizde yoğurt ve kaymak tabh edip ve bir mikdârını dahi narh-ı cârî üzere ibâdullâha bey‘ etmek ile kârhânelerimiz mesârifinden halâs olup esnâfımızdan olmayan kimesneler metâ‘ımıza müdâhale eyledikleri sûretde herbirimiz mutazarrır olacağımız zâhir iken merkūmân Makar ve Palo esnâfımızdan olmayıp mârrü’z-zikr mandıra ve sâir mahallerde hâsıl olan südü ashâbından iştirâ ve hufyeten nakl ve mahallât aralarında istedikleri bahâ ile âhara bey‘ ile kendi kârlarına kanâ‘at etmeyip nizâmımızın ihtilâline bâdî olmalarıyla men‘ ü def‘ olunmak matlûbumuzdur deyü muvâcehelerinde teşekkî eylediklerinde ve merkūmân dahi ikrâr ve fîmâ-ba‘d nizâm-ı kadîm mahallât aralarında bey‘ ile muhill-i nizâm hareket etmeyip san‘at-i melûfeleriyle meşgūl olmak üzere herbiri ta‘ahhüd ve esnâf-ı mezkûre dahi râzı ve bu vechile kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 8 min-L sene 1206.