Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 751 Hüküm no: 1243 Orijinal metin no: [102a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Uygunsuz hareketlerinden dolayı şikâyet edilen Ayşe bt. İsmail’in mahalleden çıkarılmasının istendiği Ma‘rûz Medîne-i Üsküdar’da Debbâğlar mahallesi sükkânından İmâm Ali Efendi b. Hüseyin ve Müezzin es-Seyyid el-Hâc Mehmed Said b. Lütfullah ve es-Seyyid Mehmed b. Ahmed ve Osman b. Veli ve es-Seyyid Ali b. es-Seyyid Ali ve es-Seyyid İbrahim b. Ali ve Ali b. Ahmed ve Ömer b. İsmail ve İbrahim Efendi b. İbrahim nâm kimesneler medîne-i mezbûrede mahfil-i Bâb’da meclis-i şer‘-i hatîrde mu‘arrefetü’z-zât Âişe bt. İsmail nâm hatun mahzarında mezbûre Âişe kendi hâlinde ırzıyla mukayyede [olmayıp] hadîdetü’l-lisân olup dâimâ mûcib-i ta‘zîr olur elfâz-ı kabîha ile herbirimize şetm ve ırzımızı hetk edip bizleri ta‘cîz ve tekdîrden hâlî olmamağla işbu yedimizde olan bir kıt‘a i‘lâm-ı şer‘î mûcebince mukaddemâ mahalle-i mezbûreden ihrâc olunmuşdu. Lâkin mezbûre Âişe yine mahalle-i mezbûrede iskân ve ef‘âl-ı kabîhasında ısrâr ve bi’d-defa‘ât kendiye nush ü pend eylediğimizde mütenassıha olmamağla kendüden bi’l-külliye emn ü rahatımız meslûb olmuşdur deyü mezbûre Âişe’nin sû’-i hâlini ihbâr ve fîmâ-ba‘d mezbûre Âişe mahalle-i mezbûreden ihrâc olunmak bâbında fermân-ı âlî sudûrunu ahâli-i mezbûrûndan herbiri istid‘â ve istirhâm eyledikleri bi’l-iltimâs huzûr-ı âlîlerine i‘lâm olundu. Fî 10 min-Şevvâl sene 1206.