Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 751 Hüküm no: 1244 Orijinal metin no: [102a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Boğularak ölen Kostanti’nin cesedinin incelenip gömülmesine izin verildiği Ma‘rûz Bi’l-iltimâs kıbel-i şer‘-i şerîfden meb‘ûs Kâtib Abdullah Efendi dâ‘îleri ve sâir mazbûtü’l-esâmî Müslimîn ile medîne-i Üsküdar’a tâbi‘ Beylerbeyi karyesinde vâki‘ Şeyhülislâm-ı esbak Tevfik Yahya Efendi’nin sâhilhânelerine varıp akd-i meclis-i şer‘-i şerîf etdikde sâhilhâne-i mezkûr bağçesinde Bağçevân Mihal v. Kostanti ve zevcesi mu‘arrefetü’ş-şahs Despino bt. Yorgi meclis-i ma‘kūd-ı mezkûrda herbiri takrîr-i kelâm edip oğlumuz Kostanti nâm sagīr târih-i i‘lâm günü vakt-i zuhrda bi-kazâillâhi te‘âlâ bağçe-i mezkûrda olan havuza düşüp garîkan hâlik olmağla kıbel-i şer‘den keşf ve mu‘âyene olunmak matlûbumdur dedikde hâlik-i merkūmun a‘zâsına nazar eylediklerinde eser-i cerh ve hank misillü nesne olmayıp garîkan hâlik olduğunu ba‘de’l-keşf ve’l-mu‘âyene ilkā-i hufre[ye] izin birle vâki‘ hâli mezbûr dâ‘îleri mahâllinde ba‘de’t-tahrîr ve’l-inhâ huzûr-ı âlîlerine i‘lâm olundu. Fî-gurreti Şevvâl sene 1206.