Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 752 Hüküm no: 1245 Orijinal metin no: [102b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vahide bt. Nebi ile Ayşe bt. Süleyman’ın birbirleri aleyhine açtıkları alacak davalarında iddialarını ispat edemedikleri Ma‘rûz Medîne-i Üsküdar’da Mirâhor mahallesinde sâkine mu‘arrefetü’z-zât Vâhide bt. Nebi nâm hatun medîne-i mezbûrede mahfil-i Bâb’da meclis-i şer‘-i hatîrde kezâlik zâtı mu‘arrefe Âişe bt. Süleyman nâm hatun muvâcehesinde ben mezbûre Âişe Hatun’un menzilinde ve gerek medîne-i mezbûrede vâki‘ Büyükhamam demekle ma‘rûf istîcâr eylediği hamamda kendiye bilâ-tesmiyetü’l-ecr on sene hizmetim sebkat etmekle sinîn-i mezkûrede sebkat eden hizmetimin ecr-i mislini taleb ederim deyü da‘vâ ve mezbûre Âişe Hatun cevâbında müdde‘iye-i mezbûrenin ber-vech-i muharrer hizmetini ikrâr lâkin mezbûre Vâhide’nin hizmeti mukābilesinde zevcim gāib ani’l-meclis Mehmed Ağa yediyle beher şehr altmışar paradan on senede yüz seksen guruş ve beher yevm üçer paradan on senede kendiye medfû‘um olan be-hesâb-ı guruş iki yüz yetmiş guruş cem‘an dört yüz elli guruş yedimizden ahz ü kabz eylediğinden mâ‘adâ hamam-ı mezkûra duhûl eden nisâ tâifesinin benim için şerbetlik nâmıyla beher yevm kendiye medfû‘ları olan meblağdan beher şehr on altışar guruşdan on senede bin dokuz yüz yirmi guruş ahz ü kabz edip ol-vechile ecr-i mislini beleğan mâ-beleğa istifa etmişdi deyü da‘vâ ol dahi cevâbında şerbetlik ta‘bîr olunan meblağ-ı merkūm bin dokuz yüz yirmi guruş ahz eylediğini ikrâr ve ücret-i mezkûr dört yüz elli guruş ahzını inkârından mâ‘adâ kabzını mu‘terif olduğu meblağ-ı merkūm bin dokuz yüz yirmi guruşu dahi bi’d-defa‘ât mezbûre Âişe Hatun yedine def‘ ü teslîm etmişdim deyü ba‘de’d-def‘ ve’l-inkâr müdde‘iyetân-ı mezbûretândan herbiri ber-vech-i muharrer müdde‘âlarını beyândan izhâr-ı acz edip talebleriyle herbiri gıbbe’t-tahlîfi’ş-şer‘î mûcibiyle müdde‘iyetân-ı mezbûretândan herbiri da‘vâ-yı mezkûreleriyle bilâ-beyyine mu‘ârazadan men‘ olundukları bi’l-iltimâs huzûr-ı âlîlerine i‘lâm olundu. Fî 13 min-L sene 1206.