Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 753 Hüküm no: 1247 Orijinal metin no: [102b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tütüncü Hacı İsmail tütün bedeli olarak Molla Mehmed’den alacağı olduğu Ma‘rûz Mevâdd-ı şer‘iye istimâ‘ı’çün kıbel-i şer‘den meb‘ûs Mehmed Esad Efendi dâ‘îleri medîne-i Üsküdar’a tâbi‘ Kādı karyesine varıp mazbûtü’l-esâmî Müslimîn huzûrlarında akd-i meclis-i şer‘-i âlî etdikde mahmiye-i İslâmbol’da Tahmis kurbünde sâkin Duhânî el-Hâc İsmail b. İbrahim nâm kimesne meclis-i ma‘kūd-ı mezkûrda karye-i mezbûrede sâkin Duhânî Molla Mehmed b. Süleyman nâm kimesne mahzarında mezbûr Molla Mehmed bin iki yüz beş senesi Rebî‘ülâhir’inin yedinci günü vezn ve fiyâtı beynimizde ma‘lûm yedimden iştirâ ve kabz eylediği duhân semeninden beş yüz guruş ve dükkân gediği ta‘bîr olunur âlât-ı lâzıme semeninden beş yüz guruş ki cem‘an bin guruş deyni olup hattâ meblağ-ı merkūm bin guruşu bana deyni olduğunu ikrâr ve karz unvânıyla mu‘anven ve târih-i merkūm ile müverrah işbu yedimde olan temessüğü i‘tâ eyledikden sonra meblağ-ı merkūm bin guruşun sekiz yüz yetmiş guruşunu yedinden ahz ü kabz ve yüz otuz guruşu mezbûr Molla Mehmed zimmetinde bâkī kalmağla hâlâ taleb ederim deyü ba‘de’d-da‘vâ ve’l-istintâk ve’l-ikrâr mûcibiyle meblağ-ı bâkī-i merkūm yüz otuz guruş müdde‘î-i mezbûr el-Hâc İsmail’e edâsıyla mezbûr Molla Mehmed şer‘an ilzâm olunduğunu mezbûr dâ‘îleri mahâllinde ba‘de’t-tahrîr ve’l-inhâ bi’l-iltimâs huzûr-ı âlîlerine i‘lâm olundu. Fî 13 min-L sene 1206.