Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 754 Hüküm no: 1249 Orijinal metin no: [102b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rabia Hanım bt. Abdullah’ın Dürdane Hanım bt. Abdullah’tan dört bin yedi yüz elli üç kuruş beş para alacaklı olduğu Ma‘rûz Mahmiye-i İslâmbol’da Kapalı Fırın kurbünde sâkine sâhibe-i arzuhâl Rabia Hanım bt. Abdullah nâm hatun tarafından vekîl olduğu zât-ı mezbûreyi bi’l-mu‘arrefeti’ş-şer‘iye ârifân es-Seyyid Mehmed Emin Ağa b. es-Seyyid Mehmed ve el-Hâc Selim Efendi b. Abdullah nâm kimesneler şehâdetleriyle sâbit olan el-Hâc Zohrab Ağa b. Abdullah nâm kimesne medîne-i Üsküdar’da mahfil-i Bâb’da meclis-i şer‘-i hatîrde arzuhâlde ismi mezkûre mu‘arrefetü’z-zât Dürdane Hanım bt. Abdullah nâm hatun mahzarında mezbûre Dürdane Hanım bin iki yüz beş senesi Rebî‘ülevvel’inin on beşinci günü müvekkilem mezbûre Rabia Hanım yedinden istikrâz ve kabz ve umûruna sarfla istihlâk eylediği dört bin beş yüz guruş deyni mukābilesinde medîne-i mezbûreye muzâfe Yoros nâhiye[sine] tâbi‘ Anadoluhisârı kurbünde Kanlıcak karyesinde vâki‘ ma‘lûmü’l-hudûd ve’l-müştemilât taht-ı tasarrufunda olan bir bâb vakıf sâhilhânesini bâ-ma‘rifet-i mütevellî müvekkilem mezbûre Rabia Hanım’a vefâen ferâğ ve teslîm etmekle meblağ-ı merkūm dört bin beş yüz guruş ile müvekkilem mezbûre Rabia Hanım zikr olunan sâhilhâneyi ba‘de’t-tahliye beher şehr elli altışar guruş onar para ücret ile mezbûre Dürdane Hanım’a îcâr eyledikde ol dahi istîcâr ve işbu târih-i i‘lâma gelince icâre-i mezkûreden zimmetinde müctemi‘a olan dokuz aylık beş yüz altı guruş on para ki cem‘an beş bin altı guruş on para mezbûre Dürdane Hanım zimmetinde müvekkilem mezbûrenin hakkı olmağla zikr olunan sâhilhâneyi rehniyetden fek birle meblağ-ı merkūmu bi’l-vekâle taleb ederim deyü ba‘de’d-da‘vâ ve’l-istintâk mezbûre Dürdane Hanım cevâbında deyn-i meblağ-ı merkūm dört bin beş yüz guruş ile ücret-i mezkûreden ancak dört buçuk aylık iki yüz elli üç guruş beş para hâlâ deyni olduğunu ikrâr ve ziyâde iki yüz elli üç guruş beş parayı müdde‘iye-i müvekkile-i mezbûreye edâ ve teslîm etmişdim deyü eylediği [103a] def‘ini beyâna ba‘de’l-havâle mukırre ve mu‘terife olduğu dört bin yedi yüz elli üç guruş beş parayı müdde‘iye-i müvekkile-i mezbûre Rabia Hanım’a edâya mezbûr Dürdane Hanım’a ve sâhilhâne-i mezkûreyi rehniyetden fekke müvekkilesine izâfetle vekîl-i mezbûrdan herbirine şer‘an tenbîh olunduğu mübâşiri çavuş kulları iltimâsıyla huzûr-ı âlîlerine i‘lâm olundu. Fî 13 min-L sene 1206.