Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 755 Hüküm no: 1251 Orijinal metin no: [103a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nimetullah bt. Hacı Yahya’nın kendisini gıyabında boşadığı iddiasıyla kocası aleyhine açtığı davasını ispat edemediği Ma‘rûz Medîne-i Üsküdar’da Tavâşî Hasanağa mahallesinde sâkine mu‘arrefetü’z-zât Nimetullah bt. el-Hâc Yahya nâm hatun mahfil-i Bâb’da meclis-i şer‘-i hatîrde zevci es-Seyyid Mehmed Said b. Abdullah muvâcehesinde ben mezbûr es-Seyyid el-Hâc Mehmed Said’in zevce-i menkûhası iken târih-i i‘lâmdan beş sene mukaddem mezbûr es-Seyyid el-Hâc Mehmed Said diyâr-ı Mısır’a azîmet ve Mısır’da ikāmet esnâsında beni gıyâbımda tatlîk edip hattâ beni tatlîkini müş‘ir tarafıma mu‘anven bir kıt‘a mektûb dahi irsâl etmeğin mezbûr es-Seyyid el-Hâc Mehmed Said’den mutallaka olmuşken mezbûr es-Seyyid el-Hâc Mehmed Said benim ile tekrar zevciyet irâdesinde olur deyü mutallaka olduğunu da‘vâ ol dahi cevâbında müdde‘iye-i mezbûre mehr-i müeccel tesmiyesiyle mukaddemâ zevcesi olup ber-vech-i muharrer tatlîk eylediğini inkâr etmeğin müdde‘iye-i mezbûre Nimetullah ber-vech-i muharrer müdde‘âsını beyândan izhâr-ı acz edip talebiyle mezbûr es-Seyyid el-Hâc Mehmed Said gıbbe’t-tahlîfi’ş-şer‘î mûcibiyle müdde‘iye-i mezbûre da‘vâ-yı mezkûresiyle mezbûr es-Seyyid el-Hâc Mehmed Said’e bilâ-beyyine mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 10 min-L sene 1206.