Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 756 Hüküm no: 1252 Orijinal metin no: [103a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bursa’ya sürgün edilen Cüzzamlar Zaviyesi Şeyhi Mustafa Dede’nin affolunduğu ve zaviye işlerine karışmamak kaydıyla eski odasında oturmasına izin verildiği Ma‘rûz Medîne-i Üsküdar hâricinde vâki‘ Cüzzâmlar Zâviyesi’nin mukaddemâ şeyhi sâhib-i arzuhâl Mustafa Dede b. Halil nâm kimesne medîne-i mezbûrede mahfil-i Bâb’da meclis-i şer‘-i hatîrde zâviye-i mezkûrede sâkin cüzzâm tâifesinden Şeyh Ali b. İbrahim ve ihtiyârlarından Mehmed b. Hüseyin ve Ali b. Mustafa ve Bektaş b. Mustafa ve Hüseyin b. Veliyüddin nâm kimesneler mahzarlarında bundan akdem zâviye-i mezbûrede şeyh olmamla meşîhatdan azl ve bâ-emr-i âlî Bursa’da ikāmet eylemek üzere nefy olunmuşdum. Hâlâ cürm-i sâbıkım afvıyla ıtlâk ve zâviye-i mezbûrede odamda sâkin olmak murâd eylediğimde mezbûrûn dahi bi-gayrı vechin iskân etmeyip men‘ ü def‘ dâ‘iyesinde olmalarıyla beynimizde münâza‘ât-ı kesîre vukū‘undan sonra bâ-tavassut-ı muslihîn mezbûrûndan herbiri beni odamda kemâ-fi’l-evvel iskân ve bi-gayrı hakkın ta‘cîz ve tekdîr etmeyip ve fukarâ-i mesâkîne zuhûr eden sadakātdan ba‘de’t-taksîm âid olan hissemi bana îsâl ve teslîm ve zâviye-i mezbûrede bana istinâdı olan kimesnelerden mezbûr Ali Dede’yi ta‘cîz eder ise cümlemiz ittifâkıyla zâviyeden tard ve ib‘âd olunup ve ben dahi mezbûrûnun umûr ve husûslarına müdâhale eylememek üzere beynimiz ıslâh ve tevfîk olunup kat‘-ı münâza‘a eyledik deyü mezbûr Mustafa Dede’nin takrîrini mezbûrûn dahi tasdîk eyledikleri mübâşiri çavuş kulları iltimâsıyla huzûr-ı âlîlerine i‘lâm olundu. Fî 15 min-L sene 1206.