Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 757 Hüküm no: 1254 Orijinal metin no: [103a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed b. Halil’in Seyis Hacı Ali b. Hacı Ali aleyhine açtığı alacak davasında iddiasını ispat edemediği Ma‘rûz Medîne-i Üsküdar’da misâfiren sâkin Ahmed b. Halil mahfil-i Bâb’da meclis-i şer‘-i hatîrde sâyis tâifesinden el-Hâc Ali b. el-Hâc Ali mahzarında mezbûr el-Hâc Ali’ye bundan akdem beşer guruş ücret kavliyle beş ay hizmet edip şühûr-ı mezkûrede müstahak olduğum yirmi beş guruş ile yedimden ahz ve âhara bey‘le istihlâk eylediği mecmû‘-ı kıymetleri otuz buçuk guruşa bâliğ eşyâ-i memlûkemden iki Şam alacası entari ve bir tek piştov ve iki duhân çubuğu ve bir kalpak ki cem‘an elli beş buçuk guruş hakkımı taleb ederim deyü ba‘de’d-da‘vâ ve’l-istintâk ve’l-inkâr müdde‘î-i mezbûr ber-vech-i muharrer müdde‘âsını beyâna kādir olamayıp talebiyle mezbûr el-Hâc Ali gıbbe’t-tahlîfi’ş-şer‘î mûcibiyle müdde‘î-i mezbûr husûs-ı mezkûrda mezbûr el-Hâc Ali’ye bilâ-beyyine mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 17 min-L sene 1206.