Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 757 Hüküm no: 1255 Orijinal metin no: [103b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine bt. Abdullah’ın eski kocasında mücevher bedeli olarak alacağı olduğu Ma‘rûz Medîne-i Üsküdar’da Kādıasker mahallesinde sâkine Şerife Emine bt. Abdullah nâm mecnûnenin vâlidesi ve kıbel-i şer‘den mansûbe vasîsi olan mu‘arrefetü’z-zât diğer Şerife Emine bt. Mehmed nâm hatun medîne-i mezbûrede mahfil-i Bâb’da meclis-i şer‘-i hatîrde hâlâ dâmâdı Mehmed Beşe b. Mustafa muvâcehesinde kızım mecnûne-i mezbûre Şerife Emine mezbûr Mehmed Beşe’nin elli guruş mehr-i müeccel tesmiyesiyle zevce-i menkûhası olup mahalle-i mezbûrede vâki‘ ma‘an sâkin oldukları menzillerinde kızım mecnûne-i mezbûrenin mukaffel sandığı derûnunda mevcûd ve mahfûz eşyâ-i memlûkesinden mezbûr Mehmed Beşe’nin târih-i i‘lâmdan bir gün mukaddem fuzûlî ahz eylediği biri elmas divâleli bir çift zümrüd taşlı altın küpesi ile mecmû‘ kıymetleri beş yüz guruşa bâliğ bir çift elmas taşlı bilezik ve bir elmas taşlı gerdâniyenin ancak mârrü’z-zikr küpeli işbu meclis-i şer‘de mezbûr Mehmed Beşe yedinden ahz edip mâ‘adâ bilezik ve gerdâniye mezbûr Mehmed Beşe yedinde kalmağla mevcûde ise aynlarını müstehleke ise ba‘de’s-sübût kıymet-i mezkûreleri olan beş yüz guruşu mezbûr Mehmed Beşe’den bi’l-vesâye taleb ederim deyü da‘vâ ol dahi cevâbında mecnûne-i mezbûre ber-vech-i muharrer elli guruş mehir ile zevcesi olup mârrü’z-zikr bilezik ve gerdâniyeli derûn-ı sandıkdan fuzûlî ahz eylediğini ve kıymet-i mezkûrelerinden ancak dört yüz guruş kıymetleri olduğunu ikrâr lâkin zikr olunan eşyâyı mecnûne-i mezbûreye cünûnu hâlinde yedine def‘ ve teslîm etmişdim deyü ol-vechile te‘addî olduğunu dahi ikrâr ve i‘tirâf etdikden sonra müdde‘iye-i mezbûre diğer Şerife Emine Hatun’a mârrü’z-zikr bilezik ve gerdâniyenin ziyâde kıymetini beyâna ba‘de’l-havâle zikr olunan bilezik ve gerdâniyenin kıymetlerinden mertebe-i ikrârı olan dört yüz guruşu te‘addîsine binâen bi-tarîki’z-damân müdde‘iye-i mezbûre diğer Şerife Emine Hatun’a mecnûne-i mezbûre için li-ecli’l-hıfz edâ ve teslîme mezbûr Mehmed Beşe’ye tenbîh olunduğu bi’l-iltimâs huzûr-ı âlîlerine i‘lâm olundu. Fî 19 min-L sene 1206.