Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 758 Hüküm no: 1257 Orijinal metin no: [103b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yağ taciri Seyyid Halil Ağa’nın sattığı yağ bedelinden alacağı olduğu Ma‘rûz Mahrûse-i Galata’da sâkin yağ tüccârından es-Seyyid Halil Ağa b. Abdurrahman nâm kimesne medîne-i Üsküdar Bâb Mahkemesi’nde meclis-i şer‘-i hatîrde medîne-i mezbûrede sâkin çörekçi esnâfından Abdullah b. Mehmed nâm kimesne mahzarında mezbûr Abdullah târih-i i‘lâmdan iki sene mukaddem vezn ve fiyâtı beynimizde ma‘lûm revgan-ı sâde ve çerviş semeninden beş yüz yirmi sekiz buçuk guruş hakkımın târih-i merkūmda hesâbını görüp cihet-i merkūmeden meblağ-ı merkūm zimmetinde deyni olduğunu ikrâr dahi etmekle taleb ederim deyü ba‘de’d-da‘vâ ve’l-istintâk mezbûr Abdullah cevâbında fi’l-hakīka cihet-i merkūmeden beş yüz yirmi sekiz buçuk guruşun hîn-i şirâda hesâbı görüp müdde‘î-i mezbûra zimmetinde ol-mikdâr deyni olduğunu ikrâr ve i‘tirâfıyla sâbit olmağın mûcibiyle meblağ-ı merkūm beş yüz yirmi sekiz buçuk guruşu müdde‘î-i mezbûr es-Seyyid Halil Ağa’ya edâsıyla mezbûr Abdullah şer‘an ilzâm olunduğu bi’l-iltimâs huzûr-ı âlîlerine i‘lâm olundu. Fî 21 min-Şevvâl sene 1206.