Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 759 Hüküm no: 1258 Orijinal metin no: [103b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hadice bt. Ahmed’in mehir bedelinden alacağı olduğu Ma‘rûz Mahmiye-i İslâmbol hısnı ebvâbından Azebkapısı kurbünde sâkine mu‘arrefetü’z-zât Hadice bt. Ahmed nâm hatun medîne-i Üsküdar’da mahfil-i Bâb’da meclis-i şer‘-i hatîrde zevc-i sâbıkı Halil b. Hüseyin mahzarında ben mezbûr Halil’in elli guruş mehr-i müeccel tesmiyesiyle zevce-i medhûlün-bihâsı iken târih-i i‘lâmdan altı ay mukaddem beni tatlîk etmekle mehr-i mezkûrum olan elli guruşu mezbûr Halil’den taleb ederim deyü da‘vâ ol dahi cevâbında müdde‘iye-i mezbûre mukaddemâ zevcesi olup ber-vech-i muharrer tatlîkini ve mehr-i mezkûr elli guruşun ancak otuz guruşunu ikrâr ziyâde mehrini inkârından mâ‘adâ mukırr u mu‘terif olduğu otuz guruş mehrini dahi müdde‘iye-i mezbûre Hadice Hatun yedine def‘ ü teslîm eylediğim sekiz guruş kıymetli iki döşek ve yirmi iki guruş kıymetli sekiz keyl dakīk-i hâssaya mahsûb ve takas eylediğimde ol dahi mukāssa ve kabûl edip ol-vechile zimmetim berî olmuşdu deyü def‘ eylediğinde müdde‘iye-i mezbûre Hadice Hatun cevâbında zikr olunan döşekleri ahz eylediğini ikrâr lâkin döşeklerin kıymeti yevm-i kabzda iki guruşdur deyü ziyâde kıymeti ile sekiz keyl dakīk ahzını inkâr etmeğin dâfi‘-i mezbûr Halil ber-vech-i muharrer def‘ini beyândan izhâr-ı acz edip zikr olunan döşekleri sekiz guruş kıymetle ve dakīk-i mezkûru dahi kıymet-i mezkûresiyle ahz ve ol-vechile istifâ-yı hak etmediğine bi’t-taleb mezbûre Hadice Hatun tahlîf olundukdan sonra müdde‘iye-i mezbûre Hadice Hatun ziyâde mehrini beyâna ba‘de’l-havâle mûcibiyle mehr-i meblağ-ı merkūm yirmi sekiz guruşu müdde‘iye-i mezbûreye edâ ve teslîme mezbûr Halil’e tenbîh olunduğu bi’l-iltimâs huzûr-ı âlîlerine i‘lâm olundu. Fî 20 min-L sene 1206.