Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 761 Hüküm no: 1262 Orijinal metin no: [104a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Mustafa’nın alacak davasında sulh olduğu Ma‘rûz Medîne-i Üsküdar’a tâbi‘ Anadoluhisârı’nda sâkin es-Seyyid Mustafa b. Ali nâm kimesne medîne-i mezbûrede mahfil-i Bâb’da meclis-i şer‘-i hatîrde Mehmed Sadık b. el-Hâc Ahmed mahzarında mezbûr Mehmed Sadık bin iki yüz iki senesi Muharrem’inin yirmi ikinci günü târihiyle müverrah i‘tâ eylediği temessük mantûkunca yedimden istidâne ve kabz eylediği yüz otuz guruş hakkımın otuz guruşunu yedinden ahz ve yüz guruşu mezbûr Mehmed Sadık zimmetinde bâkī kalmağla hâlâ taleb ederim deyü da‘vâ ve mezbûr Mehmed Sadık cevâbında meblağ-ı merkūmu istidâne edip temessük i‘tâsını ikrâr lâkin müdde‘î-i mezbûr es-Seyyid Mustafa’nın kabzını mu‘terif olduğu otuz guruşdan mâ‘adâ bilâ-devr-i şer‘î murâbaha nâmıyla ıyâline bi’d-defa‘ât kırk altı buçuk guruş def‘ ü teslîm etmişdim deyü def‘ine tasaddî ve beynlerinde ba‘de vukū‘i’l-münâza‘a bâ-tavassut-ı muslihîn müdde‘î-i mezbûr tasaddî eylediği da‘vâsından elli beş guruş bedel mukābelesinde sulh olup ziyâde mutâlebesine müte‘allika âmme-i de‘âvîden mezbûr Mehmed Sadık’ın zimmetini ibrâ ve ıskāt ve mezbûr Mehmed Sadık dahi murâbaha nâmıyla medfû‘una müte‘allika âmme-i de‘âvîden müdde‘î-i mezbûr es-Seyyid Mustafa’nın zimmetini ibrâ ve ıskāt ve her biri âharın ber-vech-i muharrer ibrâsını kabûl eyledikden sonra mezbûr Mehmed Sadık bedel-i sulh-ı merkūm elli beş guruşu işbu târih-i i‘lâm şehri gāyetinde müdde‘î-i mezbûr es-Seyyid Mustafa’ya edâ ve teslîm eylemek üzere ta‘ahhüd ve hâzır bi’l-meclis Etmekçi Kigork v. Asvador nâm zimmî tekeffül edip bu vechile kat‘-ı münâza‘a eyledikleri tescîl ve bi’l-iltimâs huzûr-ı âlîlerine i‘lâm olundu. Fî 19 min-Şevvâl sene 1206.