Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 763 Hüküm no: 1266 Orijinal metin no: [104a-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed adlı küçük çocuğa yönelik taciz davasından vazgeçildiği Ma‘rûz Medîne-i Üsküdar’a tâbi‘ Nerdubânlı karyesinde sâkin Ahmed nâm sagīrin ebeveyni Osman b. Ahmed ile mu‘arrefetü’z-zât Fatıma bt. Hasan medîne-i mezbûrede mahfil-i Bâb’da meclis-i şer‘-i hatîrde karye-i mezbûre sükkânından Mustafa b. Hüseyin nâm kimesne mahzarında mezbûr Mustafa târih-i i‘lâmdan sekiz gün mukaddem sagīr-i mezbûr Ahmed’i fi‘il-i şenî‘ kasdıyla ihâfe etmekle mûcib-i şer‘îsini taleb ederiz deyü eyledikleri da‘vâlarından bâ-tavassut-ı muslihîn meccânen fâriğler olup husûs-ı mezkûra müte‘allika âmme-i de‘âvîden mezbûr Mustafa’nın zimmetini ibrâ ve ıskāt ol dahi ber-minvâl-i muharrer ibrâsını kabûl edip lâkin müdde‘iyân-ı mezbûrânın mezbûr Mustafa’dan emniyetleri olmayıp istikfâl etmeleriyle mezbûr Mustafa’nın nefsine ve hîn-i mutâlebede huzûr-ı hükkâma ihzârına karye-i mezbûre sükkânından işbu hâzırûn bi’l-meclis Salih b. Mustafa ve Mehmed b. Ali ve Hasan b. İsmail nâm kimesnelerden herbiri tekeffül ve kefâletleri tescîl olunduğu bi’l-iltimâs huzûr-ı âlîlerine i‘lâm olundu. Fî 26 min-L sene 1206.