Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 763 Hüküm no: 1268 Orijinal metin no: [104b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Alemdar Mehmed Ağa’nın atının iadesi Ma‘rûz Medîne-i Üsküdar’a muzâfe Gekbûze nâhiyesine tâbi‘ Hereke karyesinde sâkin Alemdâr Mehmed Ağa b. Ahmed medîne-i mezbûrede mahfil-i Bâb’da meclis-i şer‘-i hatîrde zikri âtî bir re’s al ata vâzı‘ü’l-yed olan Ahmed Beşe b. İbrahim mahzarında ben işbu târih-i i‘lâmdan altı sene mukaddem zikr olunan al atı İznikmid kazâsı sükkânından el-Hâc Ahmed ve el-Hâc Süleyman nâm şerîklerden semen-i ma‘lûme iştirâ ve kabûl edip yedimde mülküm iken [iki] sene mukaddem işbu hâzır bi’l-meclis Mehmed Emin b. Osman nâm kimesneye elli guruş semen-i makbûza bey‘ ve teslîm etmişdim lâkin mezbûr Ahmed târih-i i‘lâmdan bir sene mukaddem ben işbu al atı iki sene mukaddem yedimde mülküm iken zâyi‘ eyledim deyü müstahıkk çıkıp ba‘de’d-da‘vâ ve’l-isbât mezbûr Mehmed Emin yedinden ahz etmekle ben dahi meblağ-ı merkūmu mezbûr Mehmed Emin’e edâ ve teslîm etmemle hâlâ zikr olunan al at mezbûr Ahmed Beşe yedinde olup istirdâda zafer bulmamla taleb ederim deyü mukaddem târih beyânıyla ba‘de’d-da‘vâ ve’l-istintâk mezbûr Ahmed cevâbında zikr olunan al atı mezbûr Mehmed Emin yedinden ber-vech-i muharrer târih-i merkūmda istihkākan ahzını ikrâr lâkin müdde‘î-i mezbûrun altı sene mukaddem şerîkân-ı mezbûrândan mâlik olup müddet-i merkūmeden beri mülkünde olduğunu inkâr etmeğin müdde‘î-i mezbûr ber-vech-i muharrer müdde‘âsını udûlden Hüseyin b. Ali ve Ali b. Mahmud nâm kimesneler şehâdetleriyle isbât etmeğin mûcibiyle zikr olunan atı müdde‘î-i mezbûra teslîme mezbûr Ahmed Beşe’ye tenbîh olunduğu bi’l-iltimâs huzûr-ı âlîlerine i‘lâm olundu. Fî 25 min-L sene 1206.