Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 764 Hüküm no: 1269 Orijinal metin no: [104b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan b. Ahmed’in hür olduğunun anlaşıldığı Ma‘rûz Tahmînen on beş yaşında olan orta boylu açık kaşlı elâ gözlü Hasan b. Ahmed nâm şâbb-ı emred medîne-i Üsküdar’da mahfil-i Bâb’da meclis-i şer‘-i hatîrde mîr-i mîrândan sâbıkā İznikmid Vâlisi Mustafa Paşa hazretlerinin tüfenkcisi iken bundan akdem fevt olan Osman Ağa b. Abdullah’ın zâhirde vâris-i ma‘rûfu olmamağla terekesi cânib-i beytü’l-mâle âid olmağın tâife-i merkūmenin bu misillü bilâ-vâris-i ma‘rûf vefât edenlerin muhallefâtlarını bi’l-emâne kabza memûr olan paşa-yı mûmâ-ileyh hazretlerinin tüfenkcibaşısı olan Bekir Ağa b. Osman tarafından ber-vech-i âtî vekîl olduğu Ali b. Ahmed ve Ali b. İdris nâm kimesneler şehâdetleriyle sâbit olan Ahmed Kapudan b. el-Hâc Ali mahzarında ben fi’l-asl Vilâyet-i Rumeli’nde Bosna Sancağı’nda vâki‘ Taşlıca kazâsına tâbi‘ Srebrenice karyesi ahâlisinden Müslimü’l-mille ve hürrü’l-asl olan Ahmed nâm kimesnenin firâşından hâsıl ve zevcesi olan hürretü’l-asl Müslime Havva Hatun’dan mütevellid olup ebeveynime aslâ rık târî olmamak manasına hürrü’l-asl iken müteveffâ-yı mezbûrun hayatında hizmetkârı olup müteveffâ-yı mezbûrun gulâmı olmak zu‘muyla emîn-i mezbûr bana ta‘arruz ve vaz‘-ı yed eder suâl olunup üzerimden yed-i mubtılasını [kasr-ı] yed ve izâlesine tenbîh ve sebîlim tahliye olunmak murâdımdır dedikde gıbbe’s-suâl vekîl-i mezbûr cevâbında müvekkilim mezbûr müteveffâ-yı mezbûrun gulâmı olmak üzere mevsûf-ı mezbûra vaz‘-ı yedini ikrâr ve vech-i meşrûh üzere hürriyetini inkâr etmeğin mevsûf-ı mezbûr Hasan ber-vech-i muharrer müdde‘âsını karye-i mezbûre ahâlisinden Mehmed b. Hüseyin ve Osman b. Mustafa ve Ömer b. Yahya ve Abdullah b. el-Hâc İbrahim nâm kimesneler şehâdetleriyle vech-i şer‘î üzere isbât etmeğin mûcibiyle mevsûf-ı mezbûr Hasan’ın hürrü’l-asl olduğuna ba‘de’l-hükm müvekkil-i mezbûr Bekir’in kasr-ı yedine vekîl-i mezbûra tenbîh olunup mevsûf-ı mezbûrun sebîli tahliye olunduğu bi’l-iltimâs huzûr-ı âlîlerine i‘lâm olundu. Fî 19 min-L sene 1206.