Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 765 Hüküm no: 1271 Orijinal metin no: [104b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail b. İbrahim’in karpuz bedelinden alacağı olduğu iddiasını ispat edemediği Ma‘rûz Medîne-i Üsküdar hâricinde Çavuşbaşı Çiftliği’nde sâkin İsmail b. İbrahim mahfil-i Bâb’da meclis-i şer‘-i hatîrde Bostanî Osman b. Mehmed mahzarında mezbûr Osman târih-i i‘lâmdan on ay mukaddem yedimden iştirâ ve kabz eylediği bostanımda sâbit karpuz yüz on beş guruş hakkımın doksan altı guruşunu yedinden ahz ü istifâ ve on dokuz guruşu zimmetinde bâkī kalmağla taleb ederim deyü da‘vâ ol dahi cevâbında bostanında sâbit olup kemâl bulmayan karpuzlarını kemâl buluncaya değin bostanında terk etmek şartıyla semen-i mezbûra iştirâ ve kabz etmişdim el-hâletü hâzihî bey‘-i mezkûrun fesâda mukāreneti hasebiyle bey‘le istihlâk eylediğim karpuz semeni ancak doksan altı guruşa bâliğ olmağla ol-vechile meblağ-ı merkūm doksan altı guruşu mezbûrun yedine def‘ ü teslîm eyledim dedikde ba‘de’l-istifsâr zikr olunan karpuzların ba‘zısı erişip ve ba‘zısının kemâl bulmadığını ikrâr ve i‘tirâf etmeğin meblağ-ı mezbûr doksan altı guruşdan ziyâde semen hâsıl olmadığına talebiyle mezbûr Osman gıbbe’t-tahlîfi’ş-şer‘î mûcibiyle müdde‘î-i mezbûr husûs-ı mezkûrda mezbûr Bostanî Osman’a mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 26 min-Şevvâl sene 1206.