Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 767 Hüküm no: 1276 Orijinal metin no: [105a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Anaştaş’ın, kendisini hata eseri olarak yaralayan Avcıoğlu Bostancı İsmail ile sulh olduğu Ma‘rûz Medîne-i Üsküdar’a muzâfe Yoros nâhiyesine tâbi‘ Yeniköy karyesinde mütemekkin olup ber-vech-i âtî kurşun yarasıyla mecrûh idiği lede’l-keşf ve’l-mu‘âyene zâhir olan Anaştaş v. Metro nâm zimmî medîne-i mezbûrede mahfil-i Bâb’da meclis-i şer‘-i hatîrde Avcıoğlu Bostanî İsmail b. Mehmed nâm kimesne tarafından ber-vech-i âtî tasdîka vekîl olan Bostanî Mehmed Beşe b. Ahmed nâm kimesne mahzarında târih-i i‘lâmdan bir gün mukaddem kable’z-zuhr yine nâhiye-i mezbûreye tâbi‘ Paşaköy demekle meşhûr nâm mahâlde mezbûr İsmail tüfenk kurşunuyla sağ kolum bâzûsundan hatâen darb ve dirseğim altından nüfûz etmekle mûcib-i şer‘îsini taleb ederim deyü eylediği da‘vâsından bâ-tavassut-ı muslihîn otuz üç guruş bedel-i makbûza sulh olup cerh-i mezkûre ve mâ yuhdesu-minhe müte‘allika âmme-i de‘âvîden mezbûr Bostanî İsmail’in zimmetini ba‘de’l-ibrâ ve’l-kabûl bu vechile kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 28 min-Şevvâl sene 1206.