Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 768 Hüküm no: 1278 Orijinal metin no: [105a-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nimetullah bt. Hacı Yahya’nın küçük oğlu için açtığı nafaka davasında sulh olduğu Ma‘rûz Medîne-i Üsküdar’da Tavâşî Hasanağa mahallesinde sâkine mu‘arrefetü’z-zât Nimetullah bt. el-Hâc Yahya nâm hatun medîne-i mezbûrede mahfil-i Bâb’da meclis-i şer‘-i hatîrde hâlâ zevci es-Seyyid el-Hâc Mehmed Said b. Abdullah muvâcehesinde ba‘dehû mezbûr es-Seyyid el-Hâc Mehmed Said’in zevce-i menkûhası olup mezbûrun firâşından hâsıl ve benden mütevellid işbu hâzır bi’l-meclis sadrî oğlum es-Seyyid Ahmed nâm sagīri babası mezbûr târih-i i‘lâmdan beş sene mukaddem bilâ-nafaka ve lâ-münfik yanımda terk ve diyâr-ı âhara azîmet eylediğine binâen sagīr-i mezbûrun nafakası için babası mezbûr üzerine bâ-hüccet-i nafaka külle yevmin altışar para farz ve takdîr ve meblağ-ı mefrûz-ı mezkûru sagīr-i mezbûrun nafaka ve kisve ve sâir levâzım-ı zarûriyesine harc u sarfa ve lede’l-hâce istidâneye ve inde’z-zafer babası mezbûr üzerine rücû‘a kıbel-i şer‘den bana izin verilip ben dahi sagīr-i mezbûru istidâne ile infâk ve iksâ etmişdim el-hâletü hâzihî oğlum sagīr-i mezbûrun nafaka-i mefrûza-i müstedânesinden işbu târih-i i‘lâma gelince elli sekiz ayda babası mezbûr es-Seyyid el-Hâc Mehmed Said zimmetinde müctemi‘ olan iki yüz altmış guruşu bi’l-mürâca‘a taleb ederim deyü takrîrine mutâbık bir kıt‘a nafaka hücceti ibrâzıyla da‘vâ ve beynlerinde ba‘de vukū‘i’l-münâza‘a bâ-tavassut-ı muslihîn müdde‘iye-i mezbûre Nimetullah Hatun tasaddî eylediği da‘vâsından zevci mezbûr ile yüz guruş bedel mukābilesinde sulh olup ziyâde müdde‘âsı olan yüz altmış bir guruşa müte‘allika âmme-i de‘âvîden mezbûr es-Seyyid el-Hâc Mehmed Said’in zimmetini ibrâ ve ıskāt ol dahi ibrâsını kabûl edip bedel-i sulh olan meblağ-ı merkūm yüz guruşu def‘aten edâya iktidârı olmayıp tecîl ve taksîte tâlib olmağla müdde‘iye-i mezbûre dahi bedel-i merkūm yüz guruşun elli guruşunu târih-i i‘lâmdan dört gün tamamında ve bâkī elli guruşu dahi şehr-i âtiyye gurresinde edâ etmek üzere mezbûr es-Seyyid el-Hâc Mehmed Said’i tecîl ve taksît eylediğinde ol dahi ber-minvâl-i muharrer müeccelen ve mukāssatan edâya ta‘ahhüd eylediği bi’l-iltimâs huzûr-ı âlîlerine i‘lâm olundu. Fî 19 min-L sene 1206.