Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 769 Hüküm no: 1279 Orijinal metin no: [105b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çevredeki köy ve mandıra ahalisinin sütlerini getirip çarşı ve pazarda ucuz bahaya satmalarına Üsküdar’daki kaymakçı ve yoğurtçu esnafının engel olmaması Ma‘rûz Medîne-i Üsküdar hâricinde vâki‘ Beylik Mandıra Ustası Mehmed Ağa b. Ali ve Bulgurlu karyesi hâricinde vâki‘ Kurdpaşa Çiftliği mültezimi Arnabud Mehmed ve Başıbüyüklü karyesi ahâlisinden Osman ve Viran karyesi ahâlisinden Bekir b. Ahmed ve Bulgurlu karyesi ahâlisinden Topcuoğlu el-Hâc Süleyman ve oğlu Ahmed nâm kimesneler meclis-i şer‘-i hatîrde medîne-i mezbûrede vâki‘ kârhâne ashâbından kaymakçı ve yoğurtçu esnâfının kethudâ vekîli Osman b. Hüseyin ve Mahmud Ağa b. el-Hâc Ali ve Ömer Beşe b. Ömer ve Mustafa b. Ahmed ve diğer Ömer b. el-Hâc Mehmed Emin nâm kimesneler ile zimmî ustası Ostoryani v. Zelpo nâm zimmî muvâcehelerinde ez-kadîm çiftlik ve kurâ ahâlilerinin gerek ağnâm ve gerek sığır ve sâir hayvanâtlarımızdan hâsıl olan südü kendi bârgirlerimize tahmîl ve çobanlarımız ile medîne-i mezbûreye nakl ve esvâk ve bâzârda rahîs bahâ ile ibâdullâha bey‘ ve def‘-i müzâyaka olunagelip kimesne tarafından dahl ü ta‘arruz îcâb etmez iken bu esnâda esnâf-ı mezbûrûn bizim kârımıza kesâd verirler deyü bizi süd bey‘inden men‘ irâdesinde olmalarıyla esnâf-ı mezbûrûnun ta‘arruzları men‘ ü def‘ olunmak matlûbumuzdur deyü teşekkî ve beynlerinde münâza‘a esnâsında iken medîne-i mezbûre ahâlisinden Hafız Ahmed Efendi ve Haseki Ahmed Ağa ve Yakub Ağa ve el-Hâc Mehmed ve el-Hâc Ali ve Ahmed Efendi ve Mehmed Ağa ve es-Seyyid Mahmud Ağa ve Hasan Ağa ve es-Seyyid Numan ve Hasan Ağa ve el-Hâc Mustafa ve es-Seyyid Ali ve Abdi Ağa ve Mehmed Efendi ve Hüseyin ve Şeyh Mehmed Said nâm kimesneler meclis-i şer‘a hâzırûn olup ez-kadîm mandıra ve kurâ ahâlileri hâsıl olan südlerini kendi bârgirlerine tahmîl ve medîne-i mezbûreye nakl ve rahîs bahâ ile esvâk ve bâzârda ibâdullâha bey‘ ve def‘-i müzâyaka ile nef‘i zâhir ve âşikârdır deyü esnâf-ı mezbûrûn muvacehelerinde ihbâr ve fîmâ-ba‘d esnâf-ı mezkûre müdde‘iyûn-ı merkūmûnun ancak bârgirleri ile çobanlarının süd bey‘ine müdâhale etmemek üzere ta‘ahhüd ve müdde‘iyûn-ı merkūmûn dahi râzı olup işbu nizâm ilâ-mâşâallâh düstûrü’l-amel tutulmak üzere tuğrâ-yı garrâ ile mu‘anven fermân-ı [cihân]-mutâ‘ sudûrunu istid‘â ve istirhâm eyledikleri bi’l-iltimâs huzûr-ı âlîlerine i‘lâm olundu. Fî 13 min-L sene 1206.