Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 770 Hüküm no: 1281 Orijinal metin no: [105b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kimin tımarı olduğu belirsiz olan Yoros’a bağlı Öyümce köyü tımarının mültezimlerinin Zelyo’nun mirasçılarından öşür bedeli talebinin meşru olmadığı Ma‘rûz Medîne-i Üsküdar’a muzâfe Yoros nâhiyesine tâbi‘ Örümce [Öyümce] karyesi tımarının berât-ı âlî-şânla mutasarrıfı olup bundan akdem vefât eden ismi ma‘lûm olmayan kimesnenin hayatında tımar-ı mezkûru bin yüz doksan dokuz senesi deruhde ve iltizâm eden es-Seyyid İbrahim bin es-Seyyid Ali ve bin iki yüz senesi deruhde ve iltizâm eden es-Seyyid İbrahim b. Abdullah nâm kimesneler medîne-i mezbûrede mahfil-i Bâb’da meclis-i şer‘-i hatîrde karye-i mezbûre civarında vâki‘ Şeyhülislâm-ı esbak merhûm Şerîfzâde Mehmed Esad Efendi hazretlerinin çiftliği mültezimi iken bundan akdem hâlik olan Zelyo v. Panço nâm zimmînin verâseti zevce-i metrûkesi Marya bt. Panço ile sulbî kebîr oğulları İsteryoni ve Kostanti ve Yorgaki ve kebîre kızları Alince ve Limoni ve zevce-i uhrâsından mütevellide Ağustos ve Mine’ye inhisârı ba‘de’t-tahakkuk zevce-i mezbûre Marya ve oğulları merkūmûn İsteryo ve Kostanti ve Yorgaki ve kızları merkūmât Alince ve Limoni ve Zağrafo ve Mine taraflarından ber-vech-i âtî vekîl-i şer‘îleri Dimitri v. Ziko nâm zimmî ile terâfu‘larında hâlik-i merkūm hayatında tımar-ı merkūm arâzisinden mutasarrıf olduğu karye-i mezbûrede vâki‘ herbiri lede’l-ahâli ve’l-cîrân ma‘lûmü’l-kıt‘a tarlalarına zer‘ eylediği buğday öşrü bedelinden mezbûr es-Seyyid İbrahim’in yüz elli guruş ve kezâlik buğday ve alef öşrü bedelinden mezbûr Ahmed’in [İbrahim’in] kırk beş guruş alacağı olup müteveffâ-yı mezbûr kable’l-edâ vefât, tereke-i vâfiyesinden taleb ederiz deyü müdde‘iyân-ı mezbûrânın takrîr-i meşrûhları üzere henüz müvekkilin ismini ta‘yîn edemediklerinden gayrı bu misillü deruhde ve iltizâm olunan tımar vekâlet nev‘inden olup sâhib-i tımarın fevti ile vekâletden mün‘azil olur makūleden olmağla vekîl-i merkūm Dimitri zimmîye suâl dahi teveccüh etmeyip müdde‘iyân-ı mezbûrânın da‘vâlarına iltifât olunmadığı bi’l-iltimâs huzûr-ı âlîlerine i‘lâm olundu. Fî-gurreti L sene 1206.