Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 771 Hüküm no: 1282 Orijinal metin no: [105b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Osman’ın alacak iddiasını ispat edemediği Ma‘rûz Medîne-i Üsküdar’da Valite-i Atik mahallesinde sâkin Mehmed b. Osman medîne-i mezbûrede mahfil-i Bâb’da meclis-i şer‘-i hatîrde Mustafa b. Hüseyin mahzarında mezbûr Mustafa târih-i i‘lâmdan on ay mukaddem bi’d-defa‘ât yedimden istidâne ve kabz eylediği kırk guruş hakkımın yirmi guruşunu yedinden ahz ve bâkī yirmi guruşu zimmetinde kalmağla taleb ederim deyü ba‘de’d-da‘vâ ve’l-istintâk ve’l-inkâr müdde‘î-i mezbûr ber-vech-i muharrer müdde‘âsını beyândan izhâr-ı acz edip talebiyle mezbûr Mustafa gıbbe’t-tahlîfi’ş-şer‘î mûcibiyle müdde‘î-i mezbûr Mehmed da‘vâ-yı mezkûresiyle mezbûr Mustafa’ya bilâ-beyyine mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 3 min-Za sene 1206.