Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 772 Hüküm no: 1285 Orijinal metin no: [106a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kahveci Seyyid Mehmed’in alacağına kefil olan Nikola ve Yorgi’yi kefillikten çıkardığı Ma‘rûz Mahrûse-i Galata’ya muzâfe Beşiktaş kasabasında vâki‘ câmi‘-i şerîf kurbünde Kahveci es-Seyyid Mehmed b. Mehmed medîne-i Üsküdar’da mahfil-i Bâb’da meclis-i şer‘-i hatîrde Kartal nâhiyesine tâbi‘ Burgaz Adası mütemekkinlerinden Nikola v. Panayot ve Yorgi v. Kiryako zimmîler muvâcehelerinde bundan akdem hâzır bi’l-meclis Vasilaki zimmî zimmetinde cihet-i karzdan yüz elli guruş alacak hakkıma merkūmân kefîl ve zâmin olup lâkin merkūm Vasilaki zimmîyi bâ-fermân-ı âlî Üsküdar Mahkemesi’ne ihzâr eylediğimde merkūmân Nikola ve Yorgi zimmîler dahi ma‘an gelip ben asîl-i merkūmdan da‘vâ etmemle merkūmân Nikola ve Yorgi zimmîleri kefâletden ihrâc ve husûs-ı merkūma ve sâireye müte‘allika âmme-i de‘âvîden merkūmân Nikola ve Yorgi zimmîlerin zimmetlerini ba‘de’l-ibrâ ve’l-kabûl kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 7 min-Za sene 1206.