Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 773 Hüküm no: 1288 Orijinal metin no: [106a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Mehmed’in alacaklı olduğu şahısların mahkemeye gelmemeleri üzerine bostancıbaşı ağaya hitaben emir çıkarılması Ma‘rûz Sâhib-i arzuhâl es-Seyyid Mehmed nâm kimesnenin medîne-i Üsküdar hâricinde Maldepe karyesi tevâbi‘inden Burgaz Adası mütemekkinlerinden Şerbetçi Vasilaki ve Yorgi ve Nikola zimmîler zimmetlerinde cihet-i karz-ı şer‘îden yüz elli guruş alacağı olmağla ihzârları bâbında şeref-rîz-i sudûr eden fermân-ı âlî ile karye-i mezbûre subaşısına hitâben bâ-mürâsele kıbel-i şer‘den ihzârları için bi’d-defa‘ât ümenâ-i dâ‘îlerinden Salih Ağa ve Hasan Ağa ve Mehmed ve Hafız Ahmed irsâl ve mûcib-i emr-i âlîyi subaşı-i merkūma ifâde ve merkūmûnun ihzârları tenbîh olundukda mütenebbih olmadığından mâ‘adâ zimmîyyûn-ı merkūmûnu ketm ve ihtifâ ve karye-i mezbûre mukāta‘ası serbest üzere yedlerinde mahfûz emr-i âlî olduğu kelâmlarından münfehim ve yirmi günden bir vechile adem-i itâ‘atlerini izhâr eyledikleri kıbel-i şer‘den ba‘s olunan ümenâ-i şer‘ ihbârlarıyla zâhir ve merkūmûnun ihzârları bâbında ser-bostaniyân-ı hâssa ağaya hitâben emr-i âlî sudûrunu istid‘â ve istirhâm eylediği bi’l-iltimâs huzûr-ı âlîlerine i‘lâm olundu. Fî 3 min-Za sene 1206.