Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 774 Hüküm no: 1291 Orijinal metin no: [106b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Mehmed’in alacağı olduğu Ma‘rûz Mahrûse-i Galata’ya muzâfe Beşiktaş kasabasında vâki‘ câmi‘-i şerîfi kurbünde kahveci sâhib-i arzuhâl es-Seyyid Mehmed b. Mustafa medîne-i Üsküdar’da mahfil-i Bâb’da meclis-i şer‘-i hatîrde derûn-ı arzuhâlde ismi mezkûr Vasilaki v. Yanaki zimmî muvâcehesinde merkūm Vasilaki zimmî târih-i i‘lâmdan altı ay mukaddem yedimden iktirâz ve kabz ve umûruna sarfla istihlâk eylediği yüz elli guruş hakkımı taleb ederim deyü ba‘de’d-da‘vâ ve’l-istintâk ve’l-inkâr müdde‘î-i mezbûr ber-vech-i muharrer müdde‘âsını lede’t-tezkiye adâletleri zâhir olan kasaba-i mezbûre sükkânından Abdi Ağa b. Mahmud ve Mustafa Beşe b. Halil nâm kimesneler şehâdetleriyle vech-i şer‘î üzere muvâcehesinde isbât etmeğin mûcibiyle meblağ-ı merkūm yüz elli guruşu müdde‘î-i mezbûr es-Seyyid Mehmed’e edâ ve teslîme merkūm Vasilaki zimmîye tenbîh olunduğu bi’l-iltimâs huzûr-ı âlîlerine i‘lâm olundu. Fî 8 min-Za sene 1206.