Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 776 Hüküm no: 1294 Orijinal metin no: [106b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Terzi Mustafa’nın küçük kızının vasisi Fatma’nın kefaletinden dolayı Ekmekçi Kirkor aleyihne açtığı alacak davasında sulh olduğu Ma‘rûz Medîne-i Üsküdar’da Hasanağa mahallesinde sâkin iken bundan akdem vefât eden Terzi Mustafa b. Abdullah’ın sulbiye sagīre kızı ve hasren vârisesi sâhibe-i arzuhâl Şerife Fatıma’nın li-üm ceddesi ve kıbel-i şer‘den mansûbe vasîsi mu‘arrefetü’z-zât Hadice bt. Mustafa nâm hatun medîne-i mezbûrede mahfil-i Bâb’da meclis-i şer‘-i hatîrde derûn-ı arzuhâlde mezkûr Etmekci Kirkor v. Bedros nâm zimmî muvâcehesinde bundan akdem hâlik olan Tuğlacı Haçok zimmî müteveffâ-yı mezbûr Terzi Mustafa yedimdem istidâne ve kabz eylediği sekiz yüz otuz üç guruşun edâsına işbu merkūm Kirkor zimmî kefîl ve zâmin oldukdan sonra mezbûrân Mustafa ve Haçok zimmîlerden herbiri kable’l-ahz ve’l-istifâ ve’l-îfâ fevt olmalarıyla meblağ-ı merkūm sekiz yüz otuz guruşu kefâletine binâen merkūm Kirkor zimmîden bi’l-vesâye taleb ederim deyü da‘vâ ve merkūm Kirkor zimmî külliyen inkâr etmeğin müdde‘iye-i vasiyye-i merkūme ber-vech-i muharrer müdde‘âsını beyândan izhâr-ı acz edip merkūm Kirkor zimmî dahi yemîn edeceği mütehakkık olmağla müdde‘iye-i vasiyye-i merkūme Hadice Hatun tasaddî eylediği da‘vâsından bâ-tavassut-ı muslihîn nef‘an li’s-sagīr an-inkâr kırk guruş bedel-i makbûza merkūm Kirkor zimmî ile sulh olup ziyâde müdde‘âsı olan yedi yüz doksan üç guruşa müte‘allika âmme-i de‘âvîden merkūm Kirkor zimmînin zimmetini ba‘de’l-ibrâ ve’l-kabûl kat‘-ı münâza‘a eyledikleri rızâlarıyla tescîl ve mübâşiri Şeyh Seyyid Ali Çavuş kulları iltimâsıyla huzûr-ı âlîlerine i‘lâm olundu. Fî-gurreti Za sene 1206.