Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 776 Hüküm no: 1295 Orijinal metin no: [106b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Paşa Vakfı’na ait Davutpaşa Camii havlusundaki harap mektebin tamir olunmasının talep olunduğu Ma‘rûz Medîne-i Üsküdar’da Davudpaşa mahallesi ahâlisinden İmâm Süleyman Efendi b. Mehmed ve Ali Ağa b. Mustafa ve Osman b. Hüseyin ve el-Hâc İbrahim b. Abdullah ve el-Hâc Ahmed Efendi b. Abdullah ve el-Hâc Osman b. Hüseyin ve Ahmed Ağa b. Süleyman ve es-Seyyid Mustafa b. Ahmed ve İbrahim Ağa b. Mustafa ve Ömer b. Süleyman ve Süleyman b. Mehmed ve el-Hâc Süleyman b. Ali ve Veli b. Molla Hüseyin ve Hafız Ali b. Süleyman nâm kimesneler meclis-i şer‘-i hatîrde nezâret-i hazret-i sadr-ı a‘zamîde âsûde olan evkāfdan merhûm Ahmed Paşa Vakfı’ndan sâlifü’z-zikr Davudpaşa Câmii havlusunda vâki‘ mekteb külliyen harâb ve vehn gelip inhidâma mâil ve derûnunda sıbyân bir vechile iskân olmak mümkün olmayıp ta‘mîr ve termîme eşedd-i ihtiyâc ile muhtâc olduğunu mütevellisine inhâ eylediğimizde mütevellî-i mezbûr ta‘mîrden imtinâ‘ ve bundan böyle ta‘mîr olunmayıp müsâmaha olunur ise külliyen münhedim olup vakf-ı mezbûr mesârif-i kesîreye giriftâr olacağından mâ‘adâ telef-i nefse bâdî olur deyü herbiri teşekkî ve sâlifü’z-zikr mektebi nâzır-ı vakıf ma‘rifetiyle keşf ve ta‘mîr olunmak bâbında fermân-ı âlîleri sudûrunu ahâli-i mezbûreden herbiri istid‘â ve istirhâm eyledikleri bi’l-iltimâs huzûr-ı âlîlerine i‘lâm olundu. Fî-selhi L sene 1206.