Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 777 Hüküm no: 1297 Orijinal metin no: [107a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İvaz Fakih Vakfı’na ait arazi üzerine mütevellinin izni olmadan yapılan binaların yıktırılması için açılan davada mülk olan binaların yıktırılmayıp ancak vakfa ait zemin vergisinin ödenmesinin uygun olacağı Ma‘rûz Vârid olan fermân-ı âlîlerine imtisâlen kıbel-i şer‘-i şerîfden meb‘ûs Mehmed Esad Efendi dâ‘îleri medîne-i Üsküdar’da Yenimahalle kurbünde Akyapu nâm mahâlde vâki‘ mukaddemâ Çiçek Nasrâniyenin ve hâlâ Alacacı İstefan zimmînin tasarrufunda olan menziline varıp mazbûtü’l-esâmî Müslimîn huzûrlarında akd-i meclis-i şer‘-i şerîf etdikde zikri âtî vakfın bâ-berât-ı âlî-şân mütevelliyesi sâhibe-i arzuhâl Hadice bt. Hüseyin nâm hatun tarafından ber-vech-i âtî vekîl olduğu zât-ı mezbûreyi bi’l-mu‘arrefeti’ş-şer‘iye ârifân Ali Efendi b. Mahmud ve Ahmed Çelebi b. Abbas nâm kimesneler şehâdetleriyle sâbit olan Ali Beşe b. Abdullah nâm kimesne meclis-i ma‘kūd-ı mezkûrda derûn-ı arzuhâlde isimleri mezkûr Alacacı İstefan v. İsayi ve Cevâhirci Maroke v. Avadik ve Keresteci Bogos v. Avanis ve Alacacı Nikagos v. Haçador ve şahsı mu‘arrefe Çiçek Nasrâniye bt. Maskod ve Rencber Vartan v. Tatos ve Yusuf Beşe b. Abdullah ve Varteris v. Kigork nâm zimmîler ile terâfu‘larında işbu üzerinde akd-i meclis-i şer‘ olunan etrâf-ı erba‘ası Soğancı menzili ve Karanfilli bağçe ve Yusuf bağı ve menzili ve tarîk-i âm ile mahdûd Çiçek Nasrâniye menzili demekle ma‘rûf tahmînen dört dönüm mikdârı bir kıt‘a kürûmu mülk bağ ve yine mahâll-i merkūm kurbünde kâin tahdîdden müstağnî Aşçıbaşı bağı demekle meşhûr ma‘lûmü’l-müştemilât iki bâb menzili hâvî bir kıt‘a kürûmu mülk bağ ve havlusunda kâin ma‘lûmü’l-hudûd ve’l-kıt‘a bâgāt ve tarla işbu yedimizde olan berât ve hudûdnâme mantûkunca müvekkilem mütevelliye-i mezbûre Hadice Hatun’un cedd-i a‘lâsı merhûm İvaz Fakih nâm sâhibü’l-hayrın gallesi evlâd ve evlâdına meşrûta müstegallâtından iken sâlifü’z-zikr Aşçıbaşı bağı üzerine iki bâb menzil ve Çiçek Nasrâniye bağı üzerine yedi bâb menzil ki cem‘an dokuz bâb menâzili bilâ-izn-i mütevellî ihdâs etmeleriyle menâzil-i mezkûre kal‘ ve ref‘ olunmak matlûbumdur deyü da‘vâ ve merkūmun cevâblarında zikr olunan bağ ve menâzilin arsası ez-kadîm ecr-i misli olan iki yüz yetmiş akçe mukāta‘alı kürûm ve binâları kendi mülkleri olmak üzere bu vechile vakf-ı mezbûr müstegallâtından olduğunu herbiri ikrârlarından gayrı vakf-ı merkūmun sâir ma‘lûmü’l-hudûd ve’l-kıt‘a tarla ve bâgātı kadîmü’l-eyyâmdan beri mukāta‘a-i misilleriyle maktû‘ ve amel-i kadîmî üzere bu tarîkiyle olduğundan başka bin iki yüz iki senesi Zilka‘de’sinin yirmi dokuzuncu günü târihiyle müverrah bir kıt‘a i‘lâm-ı şer‘î nâtık olduğu üzere mârrü’z-zikr Aşcıbaşı bağının tarîk-i âm tarafından el-Hâc Mehmed Ağa köşküne varınca taş duvar ile muhât yüz elli zirâ‘ tûlu olan arsa üzerinde mukaddemâ oda ve samanhâne ve araba ve at ahırları ve kiremit pûşîdeli sâyebân olup yirmi sene mukaddem harâb ve münhedim olmağla ebniye-i kadîmesi üzerine binâ olunup ve kezâlik Çiçek Nasrâniye bağı dahi Çiçek Nasrâniyenin mülkü olan menzili ile meşgūl olduğundan mâ‘adâ bundan akdem vakf-ı mezbûrda mütevellî vekîli Sarrâc Mustafa ve mütevellîleri olan Âişe Hatun ve Molla Hayrullah’ın menâzil-i mezkûre arsasının senevî mukāta‘a-i misli iki yüz yetmiş akçe ve ebniyeleri kendi temessükleri olmak üzere tasrîh ve beyân olunmağla bi-izn-i mütevellî menâzil-i mezkûre binâ olunduğunu hâvî iki kıt‘a mütevellî temessüğü ve bir kıt‘a i‘lâmdan müstebân ve menâzil-i mezkûre arsasının mukāta‘a-i mislini cânib-i vakf-ı mezbûrdan ahz ve ebniye-i merkūmenin yedlerinde temessükleri olmak üzere vakf-ı mezbûr mütevellîleri muvâcehelerinde otuz seneden beri bilâ-nizâ‘ zabt ve tasarruf olunagelip amel-i kadîm ve istishâb-ı hâl vech-i muharrer üzere olduğu Üsküdar Ustası el-Hâc Ali Ağa b. Mehmed Ağa ve Subaşı Halil Ağa b. Yusuf ve Bostanî Ahmed b. Abdullah ve Sarrâcbaşı Mustafa Ağa b. Mehmed Salih ve Yusuf Beşe b. Abdullah ve Mehmed Beşe b. Ali ve Hüseyin Ağa b. Mehmed ve eş-Şeyh es-Seyyid Mehmed Şûhî Efendi b. eş-Şeyh Ali ve es-Seyyid Ahmed Beşe b. İsmail ve Süleyman Beşe b. İbrahim ve es-Seyyid Hüseyin b. Ebûbekir ve diğer Süleyman Beşe b. Ali ve Sofcular Kethudâsı Ahmed Efendi b. Ali ve Çiçekci Mustafa Ağa b. Mehmed nâm kimesnelerden herbiri vekîl-i mezbûr muvâcehesinde alâ tarîki’ş-şehâde ihbârlarıyla zâhir olmağın mûcibiyle menâzil-i mezkûre arsasının mukāta‘a-i mislini kemâ-fi’l-evvel cânib-i vakf-ı mezbûra isâbet eden hisselerini herbiri edâ ve mülk olan ebniyelerinden vekîl-i mezbûrun müdâhalesi men‘ olunduğunu mezbûr dâ‘îleri mahâllinde ba‘de’t-tahrîr ve’l-inhâ mübâşiri Mustafa Çavuş kulları iltimâsıyla huzûr-ı âlîlerine i‘lâm olundu. Fî 6 min-Za sene 1206.