Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 779 Hüküm no: 1298 Orijinal metin no: [107a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali b. Mehmed’in kendisini bıçakla yaraladıkları iddiasıyla Osman ve arkadaşları aleyhine açtığı davada iddiasını ispat edemediği Ma‘rûz Medîne-i Üsküdar’da Kefçe mahallesinde handa sâkin vech-i âtî üzere mecrûh ve meşcûc idiği lede’l-keşf ve’l-mu‘âyene zâhir olan Ali b. Mehmed nâm kimesne medîne-i mezbûrede mahfil-i Bâb’da meclis-i şer‘-i hatîrde Osman b. İbrahim nâm kimesne mezbûr Osman ve refîkleri gāibân ani’l-meclis Ali ve Bostanî Hasan nâm kimesne târih-i i‘lâmdan on beş gün mukaddem medîne-i mezbûre hâricinde Tophânelizâde Çeşmesi kurbünde vâki‘ bağda beytûtet eylediğimde mezbûr Osman ve refîkleri merkūmân bağ-ı mezkûrda leylen beni ahz ve ellerim bağlayıp Yatağan bıçağıyla sağ ve sol kolum bâzûsuna darb ve cerh ve başımın bir yerinden mütelâhimeten şecc etmeleriyle mûcib-i şer‘îsini taleb ederim deyü ba‘de’d-da‘vâ ve’l-istintâk ve’l-inkâr müdde‘î-i mezbûr ber-vech-i muharrer müdde‘âsını beyândan izhâr-ı acz edip talebiyle mezbûr Osman gıbbe’t-tahlîfi’ş-şer‘î mûcibiyle müdde‘î-i mezbûr Ali husûs-ı merkūmda mezbûr Osman’a bilâ-beyyine mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 16 min-Za sene 1206.