Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 780 Hüküm no: 1300 Orijinal metin no: [107b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine bt. Mustafa’nın eşyalarını kullanılamaz hale getirdikleri iddiasıyla eski kayınatası ve kayınvalidesi Fatma Hatun aleyhine açtığı davada sulh olduğu Ma‘rûz Medîne-i Üsküdar’da Selami mahallesinde sâkine mu‘arrefetü’z-zât Emine bt. Mustafa nâm hatun medîne-i mezbûrede mahfil-i Bâb’da meclis-i şer‘-i hatîrde kendi nefsinden asîl ve zevcesi Fatıma bt. Abdullah nâm hatun tarafından ber-vech-i âtî tasdîka vekîli olan sâbıkā kayınatası es-Seyyid Ebûbekir Ağa b. Veli mahzarında ben mezbûr es-Seyyid Bekir Ağa’nın oğlu gāib ani’l-meclis es-Seyyid Mehmed’in zevcesi iken mahalle-i mezbûrede vâki‘ ma‘an sâkin olduğumuz menzil derûnunda mevcûd eşyâ-i memlûkemden mecmû‘-ı kıymetleri yüz elli guruşa bâliğ işbu mu‘âyene olunan üç hilalî gömlek ve bir sarık örtüsü ve bir çiçekli hırka ve üç çuka mak‘ad ve bir döşek şiltesi ve sekiz bürüncek gömleğimi mezbûre Fatıma Hatun’a târih-i i‘lâmdan üç ay mukaddem tîzâba ilkā ve mezbûr es-Seyyid Ebûbekir Ağa dahi sekiz aded çatma yasdıklarımı bıçak ile pâre edip ol-vechile eşyâ-i mezkûrenin kıymetleri olan yüz elli guruşu mezbûrân es-Seyyid Bekir Ağa ve Fatıma Hatun’dan bi-hükmi’d-damân taleb ederim deyü da‘vâ ve vukū‘ı’l-münâza‘a bâ-tavassut-ı muslihîn müdde‘iye-i mezbûre ber-minvâl-i muharrer tasaddî eylediği da‘vâsından elli guruş bedel-i makbûza sulh olup zikr olunan eşyâya ve ziyâde kıymetlerine ve bi’l-cümle husûs-ı mezkûra müte‘allika âmme-i de‘âvîden mezbûrân es-Seyyid Ebûbekir Ağa ve Fatıma Hatun ile zevc-i sâbıkı es-Seyyid Mehmed’in zimmetlerini ibrâ ve ıskāt ve mezbûr es-Seyyid Ebûbekir Ağa dahi asâleten ve vekâleten ibrâsını kabûl edip bu vechile kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 16 min-Za sene 1206.