Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 781 Hüküm no: 1301 Orijinal metin no: [107b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kürkçü Yorgi’nin sattığı kürk bedelinden alacağı olduğu Ma‘rûz Bi’l-iltimâs savb-ı şer‘-i enverden me’zûnen Kâtib Mehmed Salih Efendi dâ‘îleri irsâl olunup ol dahi medîne-i Üsküdar’da Kefçe mahallesinde vâki‘ Şerife Âkıle Hanım bt. es-Seyyid Halil Efendi’nin sâkine olduğu menzile varıp mazbûtü’l-esâmî Müslimîn huzûrlarında akd-i meclis-i şer‘-i şerîf etdikde mahmiye-i İslâmbol’da Mahmud Paşa-yı Velî Çarşısı’nda mütemekkin arzuhâl eden Kürkçü Yorgi v. Dimitri meclis-i ma‘kūd-ı mezkûrda kendi nefsinden asîl ve hâlâ zevcesi arzuhâlde ismi mezkûre mezbûre Şerife Âkıle Hanım tarafından husûs-ı âti’l-beyânda vekîl olduğu zât-ı mezbûreyi bi’l-mu‘arrefeti’ş-şer‘iye ârifân el-Hâc Hüseyin b. Mehmed ve Osman Efendi b. İbrahim nâm kimesneler şehâdetleriyle vech-i şer‘î üzere sâbit olan Osman Ağa b. Rüstem Ağa mahzarında târih-i i‘lâmdan bir buçuk sene mukaddem müvekkile-i mezbûre Şerife Âkıle Hanım yedimden iştirâ ve kabz eylediği evsâf ve kıymetleri beynimizde ma‘lûm kürk semeninden ba‘de külli’l-hesâb bâkī zimmetinde otuz bir guruş ve vekîl-i mezbûr Osman Ağa dahi yedimden iştirâ ve kabz eylediği ecnâs ve kıymeti beynimizde ma‘lûm kürk semeninden iki yüz yetmiş beş buçuk guruş ki zevcân-ı mezbûrân zimmetlerinde cihet-i mezkûreden cem‘an üç yüz altı buçuk guruş hakkımın yirmi bir buçuk guruşu bi’r-rızâ hat ve tenzîl ve doksan beş guruşunu dahi mukaddemâ semen-i ma‘lûme kendiye bey‘ eylediğim işbu mu‘âyene olunan sincab kürkümü rızâmızla bi’l-ikāle hüküm istirdâd ve ol-vechile ahz ve istifa ve bâkī yüz doksan guruş hakkımı taleb ederim deyü da‘vâ eyledikde ol dahi ikrâr lâkin istimhâl etmeğin müdde‘î-i merkūm Yorgaki [Yorgi] zimmî târih-i i‘lâm şehrinin yirmi beşinci günü deyn-i meblağ-ı merkūmu kendiye edâ etmek üzere mezbûr Osman Ağa’yı tecîl eyledikde ol dahi ber-vech-i muharrer ecel-i merkūm hulûlünde müdde‘î-i merkūma edâya ta‘ahhüd edip bu vechile kat‘-ı münâza‘a eylediklerini mevlana-yı mezbûr mahâllinde ketb ve tahrîr ve ma‘an meb‘ûs ümenâ-i şer‘le meclis-i şer‘a gelip alâ-vukū‘ihî inhâ ve takrîr etmeğin mübâşiri çavuş kulları iltimâsıyla huzûr-ı âlîlerine i‘lâm olundu. Fî 6 min-Za sene 1206.