Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 782 Hüküm no: 1302 Orijinal metin no: [107b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Hasan Ağa ve karısı Hacce Fatma Hanım’ın kiraya verdikleri bağa girip çıkmak için açtıkları kapıyı kapatmalarına karar verildiği Ma‘rûz Bi’l-iltimâs kıbel-i şer‘-i şerîfden meb‘ûs es-Seyyid Abdurrahman Efendi dâ‘îleri ümenâ-i şer‘le medîne-i Üsküdar’a tâbi‘ Kısıklı karyesinde vâki‘ el-Hâc Hasan Ağa b. Yunus’un menzili bağçesine varıp mazbûtü’l-esâmî Müslimîn huzûrlarında akd-i meclis-i şer‘-i şerîf etdikde el-Hâc Ahmed Efendi b. Halil meclis-i ma‘kūd-ı mezkûrda kendi nefsinden asîl ve zevcesi Hacce Fatıma bt. Abdullah tarafından ber-vech-i âtî vekîl-i müseccel-i şer‘îsi olan mezbûr el-Hâc Hasan Ağa vekâleten mahzarında işbu derûnunda akd-i meclis-i şer‘ olunan bağçe-i mezkûr kurbünde vâki‘ zevcân-ı mezbûrân el-Hâc Hasan Ağa ve Fatıma’nın münâsafeten mülkleri olan ma‘lûmü’l-hudûd dâhilen ve hâricen bir bâb menzil ve dâhiliyesi tarafından kâin eşcâr-ı müsmire ve gayr-ı müsmireyi hâvî bir kıt‘a bağları işbu târih-i i‘lâm senesi Şevvâli’l-mükerrem’in yirmi ikinci gününden bin iki yüz yedi senesi Rebî‘ülevvel’inin yirmi yedinci gününe gelinceye değin cem‘an altı aylığın üç yüz guruş ücret ile bana îcâr ve teslîm ben dahi ba‘de’l-istîcâr ve’l-kabûl meblağ-ı merkūm üç yüz guruşu yedimden tamamen ahz ü kabz etmişler idi. El-hâletü hâzihî bağçe-i mezkûreden işbu mu‘âyene olunan bağ-ı mezkûr derûnuna küşâd eyledikleri kapıdan bağ-ı mezkûra duhûl ve mahsûlâtı ahz eylediklerinden mâ‘adâ mezbûr el-Hâc Hasan Ağa dâimâ zikr olunan kapı önünde cülûs edip bağ-ı mezkûr dâhiliyesi tarafında olup nisâya mahsûs olan mahal olmağla nisâ tâifesinin mürûr u ubûr eylediklerini rü’yet ve bu vechile emn ü rahatım meslûb olmuşdur deyü zevcân-ı mezbûrân el-Hâc Hasan Ağa ve Fatıma Hatun’dan teşekkî ve zarar-ı şer‘îleri men‘ ü def‘ ve zikr olunan kapı sedd ü bend olunmak matlûbumdur deyü da‘vâ etdikde mezbûr el-Hâc Hasan Ağa ber-vech-i muharrer ikrâr u i‘tirâf etmeğin mûcibiyle zikr olunan kapıyı sedd ü bende mezbûr el-Hâc Hasan Ağa’ya şer‘an tenbîh olunduğu mezbûr dâ‘îleri mahâllinde ba‘de’t-tahrîr ve’l-inhâ huzûr-ı âlîlerine i‘lâm olundu. Fî 12 min-Za sene 1206.