Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 782 Hüküm no: 1303 Orijinal metin no: [108a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Ali b. Abdülgani’nin süt kardeşi Fatma bt. Hasan’a olan seksen kuruş borcunu üç ay on gün içerisinde ödemeye söz verdiği Ma‘rûz Medîne-i Üsküdar’da Debbâğlar mahallesinde sâkine Fatıma bt. Hasan nâm hatun tarafından ber-vech-i âtî vekîl olduğu zât-ı mezbûreyi bi’l-mu‘arrefeti’ş-şer‘iye ârifân Memiş Ağa b. Mustafa ve Hasan Ağa b. Mehmed nâm kimesneler şehâdetleriyle sâbit olan es-Seyyid Mustafa Ağa b. Hasan mahfil-i Bâb’da meclis-i şer‘-i hatîrde müvekkile-i mezbûrenin rıdâ‘an karındaşı es-Seyyid Ali b. Abdülgani mahzarında bin yüz doksan dokuz senesi Saferi’l-hayrı gurresi târihiyle müverrah müvekkilem mezbûre yedinde olan bir kıt‘a temessük mantûkunca hâzır bi’l-meclis İsmail b. Süleyman nâm kimesne zimmetinde deyn-i şer‘îden seksen guruş alacak hakkını mezbûr es-Seyyid Ali müvekkilem mezbûrenin zevcinden temessüğü alıp mezbûr İsmail’den meblağ-ı merkūm seksen guruşu emri olmaksızın ahz ve hâlâ zimmetinde kalmağla bi’l-vekâle taleb ederim deyü da‘vâ etdikde mezbûr es-Seyyid Ali vekîl-i mezbûrun ber-vech-i muharrer müdde‘âsını ikrâr ve i‘tirâf edip lâkin def‘aten edâya kudreti olmayıp tecîle tâlib olmağla târih-i kitâbdan beher şehr tamamınde yirmi altışar guruşdan üç ay on gün tamamında müvekkilem mezbûreye müeccelen ve mukāssatan edâya ta‘ahhüd eylediği bi’l-iltimâs huzûr-ı âlîlerine i‘lâm olundu. Fî 8 min-Za sene 1206.