Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 783 Hüküm no: 1304 Orijinal metin no: [108a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Debbağ halifesi Ali Beşe’nin kendisini bıçak ile yaralayan debbağ halifesi Osman ile sulh olduğu Ma‘rûz Medîne-i Üsküdar’da Balaban İskelesi’nde vâki‘ Debbâğhâne’de sâkin olup vech-i âtî üzere tarafından herbiri mecrûh ve meşcûc idiği lede’l-keşf ve’l-mu‘âyene zâhir olan debbâğ halîfesi Ali Beşe b. Ahmed medîne-i mezbûrede mahfil-i Bâb’da meclis-i şer‘-i hatîrde debbâğ halîfesi Osman b. Ahmed muvâcehesinde mezbûr Osman târih-i i‘lâm günü debbâğhâne-i mezkûrede bi-gayrı hakkın bıçak ile sol küreğim üzerinden bir yerinden ve sol uyluğum üzerinden bir yerinden darb ve cerh etmekle mûcib-i şer‘îsini taleb ederim deyü da‘vâ ol dahi cevâbında müdde‘î-i mezbûr Ali Beşe’yi ber-vech-i muharrer darb ve cerh eylediğini inkârından gayrı müdde‘î-i mezbûr zikr olunan debbâğhânede bi-gayrı hakkın sopa ile başımın sağ tarafına darb ve mütelâhimeten şecc etmekle mûcibini taleb ederim deyü da‘vâ ve vukū‘ı’l-münâza‘a bâ-tavassut-ı muslihîn müdde‘î-i mezbûr Ali Beşe ber-vech-i muharrer tasaddî eylediği da‘vâsından otuz guruş bedel-i makbûza sulh olup zikr olunan cürmlere ve mâ-yuhdesü-minhe müte‘allika âmme-i de‘âvîden mezbûr Osman’ın zimmetini ibrâ ve ıskāt ol dahi kezâlik ber-vech-i muharrer eylediği şec da‘vâsından meccânen fâriğ olup şecc-i mezkûra ve mâ-yuhdesü-minhe müte‘allika âmme-i de‘âvîden mezbûr Ali Beşe’nin zimmetini ibrâ ve ıskāt ve herbiri âharın ber-minvâl-i muharrer ibrâsını kabûl edip bu vechile kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 16 min-Za sene 1206.