Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 784 Hüküm no: 1305 Orijinal metin no: [108a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Üsküdar debbağ ustaları ile Kartal debbağ ustalarının birbirlerinden ayrı ve bağımsız olmalarından dolayı birbirlerinin işlerine karışmamaları Ma‘rûz Medîne-i Üsküdar’a muzâfe Kartal kasabasında sâkin Debbâğ es-Seyyid Abdülhalim Efendi [b.] el-Hâc Hüseyin medîne-i mezbûrede mahfil-i Bâb’da meclis-i şer‘-i hatîrde bast-ı kelâm ve ifâde-i merâm edip ez-kadîm Kartal kasabasında bir bâb debbâğhâneye münhasıra ve nefs-i Kartal ve Maldepe ve Pendik karyelerinde vâki‘ kasabânın mezbûhalarından hâsıl derileri iştirâ ve debbâğhâne-i mezkûrede işleyip ibâdullâha bey‘ olunup debbâğhâne-i mezkûrede debâgat olunan deriler kasaba-i mezbûre ve havalisine kâfi ve vâfî olup âhar debbâğhâneye mütehammil olmadığından gayrı Üsküdar debbâğ ustaları Kartal debbâğ ustasının nizâmına müdâhale etmeyip Üsküdar debbâğ esnâfından müfrez ve müstakil olup ve Kartal debbâğ ustası bulunan kimesne dahi Üsküdar esnâfından ve mahâll-i âhardan deri ta‘bîr olunur hufyeten sehm iştirâ edip işlemek nizâm-ı kadîmimizden olmağla hakīkat-i hâl istihbâr olunmak matlûbumdur dedikde Üsküdar debbâğ ustalarından işbu hâzırân bi’l-meclis Mehmed Efendi b. el-Hâc Mustafa ve Hafız Mustafa Efendi b. el-Hâc Mehmed nâm kimesnelerden herbiri istintâk ve istihbâr olunduklarında fi’l-hakīka mezbûr es-Seyyid Abdülhalim Kartal kasabası debbâğhânesinde müstakil usta olup herbirimiz âharın umûruna müdâhale etmeyip ve kasaba-i mezbûrede debbâğ olan kimesne dahi Üsküdar esnâfından deri ta‘bîr olunur sehm iştirâ etmemek beynlerinde mer‘î ve mu‘teber nizâmlarından olduğunu mezbûrânın alâ-tarîki’ş-şehâde ihbârlarıyla zâhir ve kadîmî üzere amel ve hareket olunmak üzere tuğrâ-yı garrâ ile mu‘anven emr-i âlî-şân sudûrunu istid‘â ve istirhâm eylediği bi’l-iltimâs huzûr-ı âlîlerine i‘lâm olundu. Fî 21 min-Za sene 1206.