Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 784 Hüküm no: 1306 Orijinal metin no: [108a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nefise bt. İbrahim’in vazgeçtiği nakit ve eşya hibesinden alacağı olduğu Ma‘rûz Medîne-i Üsküdar’da Solaksinan mahallesinde sâkine mu‘arrefetü’z-zât Nefîse bt. İbrahim nâm hatun medîne-i mezbûrede mahfil-i Bâb’da meclis-i şer‘-i hatîrde İmâm Hafız Mustafa Efendi b. el-Hâc Mustafa nâm kimesne mahzarında târih-i i‘lâmdan üç ay mukaddem emlâkimden nakden üç yüz guruşumu mezbûr Hafız Mustafa Efendi’ye hibe ve teslîm ve eşyâ-i memlûkemden iki minder ve iki yasdık ve iki yorgan ve iki tencere ve bir ferâce ve bir entarimi dahi on guruşa bey‘ ve semen mutâlebesinden zimmetini ibrâ etmişdim lâkin beynimizde mâni‘-i rücû‘ olmamağla ben hibe-i mezkûremden rücû‘ etmemle nakd-i meblağ-ı merkūm üç yüz guruşu ve târih-i merkūmdan bi-tarîki’l-vedî‘a yedine teslîm eylediğim yüz otuz altı guruşun bi’d-defa‘ât ahz ü istifa eylediğim yüz yirmi üç buçuk guruşdan mâ‘adâ bâkī on iki buçuk guruşu zimmetinde kalmağla meblağ-ı mecmû‘-ı merkūm üç yüz on iki buçuk guruş ile eşyâ-i muharrere-i mezkûreyi bi-a‘yânihâ taleb ederim deyü da‘vâ eyledikde ol dahi cevâbında meblağ-ı bâkī-i merkūm on iki buçuk guruş ile meblağ-ı mevhûb-ı merkūm üç yüz guruşun iki yüz otuz beş guruşu ki cem‘an iki yüz kırk yedi buçuk guruş ile eşyâ-i muharrere-i mezkûre zimmetinde el-yevm mevcûd olduğunu ikrâr ve altmış beş guruşunu mülk-i mevhûbum olduğuna binâen kendi umûruma sarfla istihlâk etmişdim deyü eylediği def‘inde yemîni ile tasdîk olunmağla mezbûr Hafız Mustafa Efendi gıbbe’t-tahlîfi’ş-şer‘î müdde‘iye-i mezbûre altmış beş guruş mutâlebesiyle mu‘ârazadan ba‘de’l-men‘ mezbûr Hafız Mustafa dahi bi’r-rızâ zikr olunan eşyâyı müdde‘iye-i mezbûreye ba‘de’t-teslîm meblağ-ı bâkī-i merkūm iki yüz kırk yedi buçuk guruşu dahi müdde‘iye-i mezbûre Nefîse Hatun’a redd [ü] teslîme mezbûr Hafız Mustafa Efendi’ye şer‘an tenbîh olunduğu bi’l-iltimâs huzûr-ı âlîlerine i‘lâm olundu. Fî 13 min-Şevvâl sene 1206.