Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 785 Hüküm no: 1307 Orijinal metin no: [108b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Miskinler Zaviyesi Vakfı yakınında bulunan boş arazinin İbrahim Ağa Zaviyesi Vakfı’na ait olduğunun anlaşıldığı Ma‘rûz Sâdır olan fermân-ı âlîlerine imtisâlen taraf-ı şer‘den irsâl olunan Ahmed Efendi dâ‘îleri ve zikri âtî husûsu bi’l-ma‘iye rü’yete memûr hâlâ Haremeyn-i Şerifeyn Müfettişi umdetü’l-müderrisîni’l-kirâm es-Seyyid Abdurrahman Efendi tarafından meb‘ûs Hocazâde Mehmed Tâhir Efendi dâ‘îleri hâssa mi‘mârlarından Halil Reşid ve Nuri Süleyman halîfeler ile medîne-i Üsküdar hâricinde Miskinler Zâviyesi kurbünde kâin zikri âtî münâza‘un-fih olan hâlî arâzi üzerine varıp mazbûtü’l-esâmî Müslimîn huzûrlarında akd-i meclis-i şer‘-i münîr etdiklerinde mârrü’z-zikr Miskinler Zâviyesi fukarâlarından ashâb-ı arzuhâl fukarâya âid evkāfın gallesini cem‘a ta‘yîn olan zâviye-i mezbûre şeyhi Şeyh Ali b. İbrahim ve Bektaş b. Mustafa ve Ali b. Mustafa ve Mehmed b. Halil ve Mustafa b. Halil ve Ahmed b. Mehmed ve Mehmed b. Hüseyin ve Hüseyin b. İbrahim ve Salih b. Ali ve Osman b. Ali ve Hüseyin b. Veli ve Mehmed b. Mehmed ve Mehmed b. İbrahim ve Mehmed b. Abdi ve Ali b. Abdülkerîm Dede herbiri meclis-i ma‘kūd-ı mezkûrda zikri câî hâlî arâzinin İbrahim Ağa Vakfı’ndan olmak üzere el-yevm ber-mûceb-i temessük bi’l-icâreteyn mutasarrıfı olan Mehmed Ağa b. Hüseyin hâzır olduğu hâlde Bâbüssa‘âdeti’ş-şerîfe ağası hazretlerinin nezâretlerinde olan evkāfdan medîne-i mezbûre hâricinde vâki‘ merhûm İbrahim Ağa Zâviyesi Vakfı’nın bi’l-fi‘il mütevellisi olup derûn-ı arzuhâlde mezkûrü’l-ism Bostanî Mustafa b. Süleyman mahzarında takrîr-i kelâm edip işbu yedimizde olan iki kıt‘a temessük mantûklarınca bir tarafdan Tazıcılar Çayırı ve bir tarafdan ba‘zan yine bizlere mahsûs olan çayır ve ba‘zan mezaristân ve bir tarafdan yine mezaristân ve bir tarafdan mârrü’z-zikr İbrahim Ağa Zâviyesi Vakfı’ndan tarla ile mahdûd tahmînen on altı dönüm mikdârı tarla ashâb-ı hayrâtdan Kasım Ağa’nın yedinde mülkü iken bin yirmi dört senesinde mahâll-i mezkûru vakf ve Miskinler Zâviyesi fukarâsına şart ve ta‘yîn edip ber-vech-i muharrer Miskinler Zâviyesi fukarâsı taraflarından zabt ü tasarruf olunagelir iken mahâll-i mezkûru Kız Kulesi dizdârları kendi tımarları arâzisinden olmak üzere bin altmış dört senesi bir takrîb zabt ü tasarruf eylediklerinden sonra yine bizler zabt ü tasarruf edip yedimizde iken mahâll-i mezkûrdan işbu mu‘âyene olunduğu üzere tahmînen sekiz dönüm mikdârı üzerinde akd-i meclis-i şer‘-i şerîf olunan hâlî tarla mahâllini işbu mütevellî-i mezbûr Bostanî Mustafa Ağa mârrü’z-zikr İbrahim Ağa Zâviyesi Vakfı’ndan olmak üzere zabt ü tasarruf irâdesiyle bizim zabt ü tasarrufumuza bî-vech-i şer‘î müdâhale eder suâl olunup müdâhalesi men‘ ü def‘ olunmak murâdımızdır deyü mahâll-i mezkûr ber-vech-i muharrer Kasım Ağa Vakfı’ndan mıdır yâhûd Kız Kulesi dizdârları tımar arâzisinden midir henüz tashîh-i da‘vâ edemediklerinden mâ‘adâ ittisâlinde vâki‘ bir kıt‘a tarlayı zirâ‘at ve hırâset edegeldiğimize binâen mahâll-i mezkûru dahi bizler zabt murâd ederiz deyü bî-vech-i şer‘î nizâ‘a tasaddî eylediklerinde ba‘de’l-istifsâr mütevellî-i mezbûr Mustafa Ağa cevâbında fi’l-hakīka bâlâda tahdîd ve tavsîf olunan mahâll-i mezkûrun işbu üzerinde akd-i meclis-i şer‘-i şerîf olunan bir tarafdan Haydarpaşa’dan gelen tarîk-i âm ve bir tarafdan zâviye-i mezkûre mukābilinde kâin Çıraktaşı mahâlli ve bir tarafdan mezaristân ve bir tarafdan mütevellîsi olduğum mârrü’z-zikr İbrahim Ağa Vakfı’ndan tarla ile mahdûd tahmînen sekiz dönüm mikdârı boz [ve] hâlî tarla mahâlli işbu hâzır bi’l-meclis mezbûr Mehmed Ağa’nın yedinde olan iki kıt‘a vakıf temessükleri mantûklarınca kadîmden beri mârrü’z-zikr İbrahim Ağa Zâviyesi Vakfı’ndan olmak üzere senevî üç bin akçe müeccele ile bilâ-nizâ‘ zabt ü tasarruf olunagelip tedâvül-i eyâdî ile bin yüz kırk dört senesinde sâbıkā Üsküdar Ustası Süleyman Usta’nın kezâlik üç bin akçe müeccele ile ber-mûceb-i temessük bi’l-icâreteyn tasarrufunda iken bin yirmi dört senesinde bilâ-veled fevt oldukda arâzi-i mezkûre mahlûlünden iki bin beş guruş mu‘accele ve müeccele-i kadîmesiyle işbu mezbûr Mehmed Ağa’ya İbrahim Ağa Vakfı cânibinden îcâr ve yedine memhûr temessük i‘tâ olunmağın ol-vechile mahâll-i mezkûr kadîmden beri sâlifü’z-zikr İbrahim Ağa Vakfı musakkafâtından olmak üzere bi’l-icâreteyn zabt ü tasarruf olunageldiğine binâen mahâll-i mezkûru fukarâ-yı mezbûrûnun ber-vech-i muharrer zabt ü tasarruflarına müdâhalesini ikrâr ve mâ‘adâyı inkâr etmeğin gıbbe’l-istihbâr hakīkat-i hâl mütevellî-i merkūmun bâlâda takrîr ve beyân eylediği minvâl üzere olduğunu ve arâzi-i mezkûre altmış seneden beri bilâ-nizâ‘ İbrahim Ağa Vakfı’ndan olmak üzere zabt ü tasarruf olunageldiğini medîne-i mezbûre ahâlisinden olup lede’t-tezkiye adâletleri ihbâr olunan Veli b. Mustafa ve Hafız Hasan b. Salih ve Osman Efendi b. Salih ve Ahmed b. Süleyman ve Poyraz Mehmed b. Süleyman ve Mustafa b. Bayram ve Ali b. Ali ve Mahmud b. İsmail ve Mehmed b. Ömer ve Uzun Ali b. Hasan ve Ali b. Süleyman ve Mehmed b. Ahmed ve Bölükbaşı Mehmed b. Hüseyin ve Kahveci es-Seyyid Abdi b. es-Seyyid Ali ve Hasan Ağa b. Hüseyin nâm kimesnelerden herbiri şeyh-i merkūm Ali ve fukarâ-yı mezbûrûn muvâcehelerinde vech-i şer‘î üzere alâ-tarîki’ş-şehâde haber vermeleriyle mûcibiyle arâzi-i mahdûd-ı mezkûru İbrahim Ağa Vakfı cânibinden mütevellî-i merkūmun ber-vech-i muharrer zabt ü tasarrufuna bî-vech-i şer‘î müdâhale ve mu‘âraza etmemek üzere fukarâ-yı mezbûrûndan herbirine tenbîh olunduğu ba‘de’l-inhâ huzûr-ı âlîlerine i‘lâm olundu. Fî 19 min-Za sene 1206.