Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 787 Hüküm no: 1308 Orijinal metin no: [108b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmügülsüm bt. Hasan’ın emanet ettiği eşyaların başkasına verildiği iddiasıyla açtığı davada sulh olduğu Ma‘rûz Medîne-i Üsküdar’da Kefçe mahallesinde sâkine mu‘arrefetü’z-zât Ümmügülsüm bt. Hasan nâm hatun medîne-i mezbûrede mahfil-i Bâb’da meclis-i şer‘-i hatîrde hamal tâifesinden Musa b. Süleyman mahzarında târih-i i‘lâmdan üç gün mukaddem mahalle-i mezbûrede Ayazma İskelesi’ne nakl için mezbûr Hammâl Musa yedine def‘ ü teslîm eylediğim eşyâ-i memlûkemden cem‘an kıymetleri yüz yedi guruşa bâliğ dört çârşeb ve bir entari ve bir hırka ve sekiz sahan ma‘a kapak ve üç cedîd hilalî gömlek ve üç sagīr lenger ve bir hamam tası ve bir basma boğça ve bir beyaz entari ve bir mikdâr boğası ve üç şamdan ve bir köhne sincab kürk ve bir sini ve iki yorgan çârşebi ve bir mücessem yemenimi âhara def‘le istihlâk etmekle kıymet-i mezkûresi olan meblağ-ı merkūm yüz yedi guruşu tazmîn murâd ederim deyü da‘vâ ve mezbûr Hammâl Musa cevâbında ancak beş guruş kıymetleri olan bir yasdık yüzü ve bir köhne hırka ve bir sinisini ber-vech-i muharrer nakl için müdde‘iye-i mezbûre yedinden ahz ve âhara def‘le istihlâkini ikrâr lâkin müdde‘iye-i mezbûrenin ziyâde müdde‘âsını inkâr etmekle müdde‘iye-i mezbûre Ümmügülsüm vech-i muharrer üzere ziyâde müdde‘âsını beyân esnâsında bâ-tavassut-ı muslihîn tasaddî eylediği da‘vâ-yı mezkûresinden mezbûr Musa ile an-inkâr beş guruş bedel-i makbûza sulh olup ziyâde müdde‘âsına ve bi’l-cümle husûs-ı merkūma müte‘allika âmme-i de‘âvîden mezbûr Musa’nın zimmetini ibrâ ve ıskāt ol dahi ber-vech-i muharrer ibrâsını kabûl edip kat‘-ı münâza‘a eyledikleri tescîl ve bi’l-iltimâs huzûr-ı âlîlerine i‘lâm olundu. Fî 22 min-Za sene 1206.