Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 788 Hüküm no: 1311 Orijinal metin no: [109a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yağcı Tanaş’ın alacaklısı Marko’ya kefaletinden dolayı alacağı olduğu Ma‘rûz Mahrûse-i Galata’da mütemekkin Yağcı Tanaş v. Kataroz zimmî medîne-i Üsküdar’da mahfil-i Bâb’da meclis-i şer‘-i hatîrde medîne-i mezbûrede Kolluk kurbünde mütemekkin Bakkāl Akrit v. Sonil zimmî muvâcehesinde merkūm Akrit zimmînin gāib ani’l-meclis Marko zimmîye ecnâs-ı zehâir semeninden iki yüz elli guruş deynine bi’l-emr ve’l-kabûl kefîl ve zâmin olup hattâ merkūm Akrit zimmî cihet-i kefâletden iki yüz elli guruşu ikrâr ve karz unvânıyla yedime bir kıt‘a Rûmî temessük i‘tâ eyledikden sonra meblağ-ı merkūmun iki yüz otuz guruşunu mâlımdan merkūm Marko zimmîye edâ ve teslîm etmemle medfû‘um olan iki yüz otuz guruşun yüz guruşunu merkūm Akrit zimmîden mürâca‘at ve ahz edip bâkī yüz otuz guruşu merkūm Akrit zimmî zimmetinde kalmağla bi’l-mürâca‘a taleb ederim deyü da‘vâ ve merkūm Akrit zimmî cevâbında kefâlet ve temessük i‘tâsını ikrâr lâkin müdde‘î-i merkūmun müdde‘âsı olan yüz otuz guruşu gāib-i merkūm Marko zimmîye def‘ ve teslîm eylediğini inkâr etmeğin müdde‘î-i merkūm Tanaş zimmî ber-vech-i muharrer müdde‘âsını udûlden Hafız es-Seyyid Mustafa Efendi b. es-Seyyid Mehmed ve es-Seyyid Mehmed Beşe b. Ahmed nâm kimesneler şehâdetleriyle vech-i şer‘î üzere muvâcehesinde isbât etmeğin mûcibiyle meblağ-ı merkūm yüz otuz guruşu müdde‘î-i merkūm Tanaş zimmîye bi-hükmi’l-kefâle edâsıyla merkūm Akrit zimmîye şer‘an tenbîh olunduğu bi’l-iltimâs huzûr-ı âlîlerine i‘lâm olundu. Fî 13 min-Za sene 1206.