Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 789 Hüküm no: 1312 Orijinal metin no: [109a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çukadar Osman Ağa’nın alacağı olduğu iddiasıyla Seyyid Mehmed aleyhine açtığı davada sulh olduğu Ma‘rûz Mahmiye-i İslâmbol’da Davudpaşa mahallesi sükkânından Çukadâr-ı sadr-ı a‘zamî Osman Ağa b. Yakub medîne-i Üsküdar’da mahfil-i Bâb’da meclis-i şer‘-i hatîrde es-Seyyid Mehmed b. Abdurrahman mahzarında mezbûr es-Seyyid Mehmed târih-i i‘lâmdan üç sene mukaddem yedimden bi-tarîki’l-karz istidâne ve kabz eylediği yüz yetmiş guruş zimmetinde hakkım olup hattâ meblağ-ı merkūm bana deyni olduğunu müş‘ir yedime bir kıt‘a temessük dahi i‘tâ etmekle taleb ederim deyü ba‘de’d-da‘vâ ve vukū‘i’l-münâza‘a bâ-tavassut-ı muslihîn müdde‘î-i mezbûr ber-vech-i muharrer eylediği da‘vâsından doksan guruş bedel mukābilesinde sulh olup ziyâde müdde‘âsı olan seksen guruşa müte‘allika âmme-i de‘âvîden mezbûr es-Seyyid Mehmed’in zimmetini ba‘de’l-ibrâ ve’l-kabûl bedel-i sulh olan meblağ-ı merkūm doksan guruşu def‘aten edâya kudreti olmayıp tecîle tâlib olmağla müdde‘î-i mezbûr Osman Ağa dahi bedel-i sulh-ı merkūm doksan guruşu târih-i i‘lâmdan doksan bir gün tamamında edâ etmek üzere bi’t-taleb mezbûr es-Seyyid Mehmed’i tecîl eylediğinde ol dahi ber-vech-i muharrer müeccelen edâya ta‘ahhüd edip bu vechile kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 20 Za sene 1206.