Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 790 Hüküm no: 1313 Orijinal metin no: [109a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gebze Kasabası ahalisi tarafından uygunsuz hareketleri şikâyetiyle Fatma bt. Mustafa’nın kasabadan sürülmesi Ma‘rûz Medîne-i Üsküdar’a muzâfe Gekvize nâhiyesinde Küçük Mescid-i Şerîf mahallesi sâkinelerinden işbu i‘lâm hâmişinde mastûr derûn-ı arzda mezkûretü’l-ism Fatıma bt. Mustafa nâm hatunun keyfiyet-i hâli işbu arza nazar-birle kasaba-i mezbûre ahâlisinden mevsûku’l-kelim bî-garaz kimesnelerden tefahhus ve gadrdan ârî vechile hakīkat-i hâlini i‘lâm edesiz deyü tarafımıza hitâben şeref-bahş-ı sudûr eden fermân-ı âlî mûcebince kasaba-i mezbûre ahâlisinden Hoca Ahmed Efendi b. Mustafa ve Mehmed Ağa b. Memiş ve Hüseyin Ağa b. Mehmed ve Mehmed b. Ahmed ve es-Seyyid Mehmed b. Hasan ve Mehmed b. Hüseyin ve es-Seyyid Hasan b. Hasan nâm kimesneler meclis-i şer‘a ihzâr ve mezbûre Fatıma’nın keyfiyet-i hâli suâl olundukda fi’l-hakīka mezbûre Fatıma kendi hâlinde ırzıyla mukayyede olmayıp kendiye nâ-mahrem ve ecnebî ba‘zı mechûlü’l-ahvâl kimesneleri fevâhiş makūlesi avratlar ile menzilinde beytûtet ve bi’d-defa‘ât kendiye nush ü pend eylediğimizde mütenassıha olmayıp âdet-i melûfesinde ısrâr ve men‘ irâdesinde olduğumuzda cümlemize şütûm-ı galîza ve kelimât-ı kabîha ile şetm ile dâimâ tekdîr ve cümlemizin kendüden bi’l-külliye emn ü rahatımız meslûb olmuşdur deyü sû’-i hâlini ve ef‘âl-i nâ-marzıyesini ve adem-i emniyetlerini ba‘de’l-ihbâr mezbûre Fatıma fîmâ-ba‘d kasaba-i mezbûrede iskân etmeyip li-ecli’t-tedîb bilâd-ı âhara nefy ü iclâ olunmak bâbında fermân-ı âlîleri sudûrunu ahâli-i mezbûrûndan herbiri istid‘â ve istirhâm eyledikleri bi’l-iltimâs huzûr-ı âlîlerine i‘lâm olundu. Fî 28 min-Za sene 1206.