Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 791 Hüküm no: 1315 Orijinal metin no: [109b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Devlet Derviş ile karısının oğullarını kazâen yaralayan Kostanti aleyhine açtıkları davada sulh oldukları Ma‘rûz Medîne-i Üsküdar’a muzâfe Yoros nâhiyesine tâbi‘ Paşa karyesinde mütemekkin olup sağ diz kapağı altından piştov kurşun yarasıyla ber-vech-i âtî mecrûh idiği lede’l-keşf ve’l-mu‘âyene zâhir olan Memiş nâm sagīr Kıbtînin babası Devlet Derviş b. Deniz nâm Kıbtî ile anası ve kezâlik velisi şahsı mu‘arrefe Gülbeyaz bt. Hüseyin nâm Kıbtiyeden herbirleri medîne-i mezbûrede mahfil-i Bâb’da meclis-i şer‘-i hatîrde Kostanti v. Aleksi nâm zimmî tarafından ber-vech-i âtî tasdîka vekîli olan Niko v. Radoşti nâm zimmî muvâcehesinde bi’l-velâye bast-ı kelâm ederler ki târih-i i‘lâmdan üç gün mukaddem mezbûr Kostanti zimmî karye-i mezbûrede ba‘de’s-subh kendi piştovu çakmağını tahrîk ederken kazâen piştovı boşadıp kurşunu oğlumuz mezbûrun sağ dizi altından darb ve kemiğinden nüfûz ve cerh etmekle beynimizde münâza‘ât-ı kesîre vâki‘ olmuşdu el-hâletü hâzihî beynimize muslihûn vesâtetiyle merkūm Kostanti zimmî bize mâlından nakden yirmi guruş def‘ ü teslîm eyledikde biz dahi yedinden tamamen ahz ü kabz ve oğlumuz merkūm Memiş’in cerh-i mezkûruna ve mâ-yuhdesü-minhe müte‘allika âmme-i de‘âvîden merkūm Kostanti zimmînin zimmetini bi’l-velâye herbirimiz ibrâ ve ıskāt eylediğimizde ol dahi ibrâmızı kabûl eyledi deyü mukırrân-ı merkūmânın takrîr-i meşrûhlarını vekîl-i merkūm Niko zimmî tasdîk ve bu vechile kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 22 min-Za sene 1206.