Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 795 Hüküm no: 1324 Orijinal metin no: [110a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bostancı Süleyman Beşe’nin kardeşi Şahin’in borcuna kefaletinden dolayı alacağı olduğu Ma‘rûz Medîne-i Üsküdar’da Gerede mahallesinde sâkin Bostanî Süleyman Beşe b. Halil nâm kimesne medîne-i mezbûrede mahfil-i Bâb’da meclis-i şer‘-i hatîrde Serkiz v. Delot nâm zimmî muvâcehesinde merkūm Serkiz zimmînin li-ebeveyn er karındaşı işbu hâzır bi’l-meclis Şahin nâm zimmî bin iki yüz altı senesi Saferi’l-hayrı’nın gurresi günü târihiyle müverrah işbu yedimde olan bir kıt‘a temessük nâtık olduğu üzere yedimden bi-tarîki’l-karz istidâne ve kabz ve umûruna sarfla istihlâk eylediği yüz guruş hakkımın edâsına işbu merkūm Serkiz zimmî bi’l-emr ve’l-kabûl kefîl ve zâmin olmağla meblağ-ı merkūm yüz guruşu merkūm Serkiz zimmînin kefâletine binâen taleb ederim deyü ba‘de’d-da‘vâ ve’l-istintâk ve’l-ikrâr mûcibiyle meblağ-ı merkūm yüz guruşu bi-hükmi’l-kefâle müdde‘î-i mezbûra edâsıyla merkūm Serkiz zimmî şer‘an ilzâm olunduğu bi’l-iltimâs huzûr-ı âlîlerine i‘lâm olundu. Fî 5 min-Z sene 1206.