Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 795 Hüküm no: 1325 Orijinal metin no: [110a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yedikule’den diğer bölgelere kayıklarla taşınacak koyun ve kuzuların taşıma tarifesi belli olduğundan daha aşağı fiyat teklif olunmaması Ma‘rûz Medîne-i Üsküdar’da İskele-i kebîr kayıkçılarından kethudâları Osman Ağa b. Nebi ve tâife-i mezbûreden Mustafa b. Mustafa ve Ahmed Ağa b. Ali ve es-Seyyid İbrahim b. Hüseyin nâm kimesneler meclis-i şer‘-i hatîrde mahmiye-i İslâmbol hısnı ebvâbından Yedikule kapısı dâhilinde Kasab el-Hâc Hüseyin b. Ömer ve Hafız Ömer b. el-Hâc Ali nâm kimesneler muvâcehelerinde işbu yedimizde olup bin iki yüz bir senesi Recebi’l-ferd’in on yedinci günü târihiyle müverrah bir kıt‘a i‘lâmda tasrîh olunduğu üzere ez-kadîm kasab tâifesi kasabbaşı ma‘rifetiyle Yedikule’de koyun ve kuzu tevzî‘ olunduğu vakitde bizim iskelemizin kebîr kayıkları ile Yedikule’den yüz yirmi para ve Ayvansaray’dan yüz para ve İslâmbol Eminönü İskelesi’nden yetmiş para ve Tophâne’den altmış para ve Beşiktaş’dan elli para ücret ile Üsküdar ve kezâlik Üsküdar’dan mahâll-i mezkûra dahi bu vechile nakletmek üzere kadîmden beri ücret kat‘ ve nizâm-ı müstahseneye rabt ve işbu nizâm beynimizde mer‘î ve mu‘teber iken bu esnâda îd-i adhâ takarrub ve Anadolu cânibinden zuhûr eden ağnâmın nakli husûsunda kasab tâifesinden mezbûrân el-Hâc Hüseyin ve Hafız [Ömer] ücret-i mu‘ayyeneyi vermeyip bize noksân ücret teklif ve ol-vechile nizâm-ı kadîmimizin ihtilâline bâ‘is ve bâdî olmalarıyla men‘ ü def‘ olunmak matlûbum[uz]dur deyü takrîrlerine mutâbık ve târih-i merkūm ile müverrah bir kıt‘a i‘lâm ibrâzıyla teşekkî etdiklerinde onlar dahi cevâblarında hâl müdde‘iyûn-ı merkūmûnun takrîrleri üzere olduğunu ve mazmûn-ı i‘lâm-ı mezkûru ikrâr ve i‘tirâf etmeleriyle mûcebiyle bâlâda tahrîr ve beyân olunan mahâll-i mezkûre ta‘yîn olunan ücretlerden noksân teklif etmeyip tamamen teslîm etmek üzere mezbûrân el-Hâc Hüseyin ve Hafız Ömer’e ba‘de’t-tenbîh işbu nizâm ilâ-mâşâallâhu te‘âlâ düstûrü’l-amel tutulmak bâbında tuğrâ-yı garrâ ile müvaşşah fermân-ı cihân-mutâ‘ sudûrunu istid‘â ve istirhâm eyledikleri bi’l-iltimâs huzûr-ı âlîlerine i‘lâm olundu. Fî-gurreti Z sene 1206.